Trajneri i kombëtares së Shqipërisë, Kristian Panuçi, përpiqet “të vërë rregull” menjëherë. Në grumbullimin e tij të parë me kuqezinjtë, në prag të 2 ndeshjeve kualifikuese me Lihtenshtejnin dhe Maqedoninë, italiani ka “lënë në shtëpi” sulmuesin Cikalleshi, i cili ka kërkuar të mos ishte në grumbullim, pasi nënshkruante kontratën me ekipin e ri.
“Mora një telefonatë nga Cikalleshi ku më thoshte se nuk mund të vinte se kishte një skuadër ku duhej të firmoste kontratën. Unë e dëgjova dhe i thashë se nuk mund t´i jepja leje që të mos vinte në kombëtare. Duke mos marrë avionin sot në orën 8:30, duke mos ardhur në orar në grumbullim, ai do të rrijë në shtëpi. Këto janë rregulla që i bëj unë, e duhet t’i respektojmë, e rëndësishme është që të gjithë të jenë mirë dhe të lumtur, nuk i lejoj askujt të bëjë siç do”, është shprehur për mediat trajneri italian.
Panuçi deklaroi se ka pranuar ndjesën e Taulant Xhakës, pas telefonatës së tij, por theksoi se mosgrumbullimi në këto ndeshje është bërë për arsye teknike.
Trajneri u shpreh i lumtur që ka një dualitet mes portierëve, duke deklaruar se janë të dy shumë të mirë. Lidhur me mundësitë e pakta që ofron sulmi, vetëm me Sadikun, Panuçi tha se ka edhe lojtarë të tjerë si Latifi, Llullaku apo Memushaj, që mund të përshtaten. Përsa i përket sistemit të lojës, italiani u shpreh se me lojtarët që janë grumbulluar, mund të luhet si me skemën 4-3-3 ashtu edhe më kalimin në 3-5-2, por se do ta vendoste në fund.
Panuçi deklaroi fitoren si të vetmin opsion për të dy ndeshjet, duke iu kërkuar lojtarëve t’i përmbahen skemave, e të kenë presingun si mënyrë për rifitimin e topit. Panuçi “mbrojti” edhe 3 afrimet që bëri në këtë grumbullim, Alliun, Memollën dhe Ahmedin. “ Aliji nuk ka luajtur dhe Memolla po luan shumë mirë. Balliun shkova ta shihja dhe është një atlet i mirë, një lojtar që duhet të përmirësohet shumë, por mendoj se e meritonte mundësinë për të ardhur në kombëtare. Duhet të përmirësohet shumë, por luan te Metz dhe e meritonte të vinte. Ahmedi ka karakteristika të veçanta, luan me të majtën dhe ka aftësi në një kundër një. Nuk kemi shumë lojtarë si ai”, tha për mediat trajneri i Kombëtares. /tesheshi.com/
