Trajneri i kombëtares shqiptare, italani Kristian Panuçi, ka kritikuar prindërit e futbollistit Kosovar, Edon Zhegrova, për ndërhyrje në vendimin se për cilin ekip përfaqësues të luajë.
Zhegrova, i njohur si “Messi kosovar”, pritet të debutojë për Kosovën në miqësoret ndaj Madagaskarit dhe Burkina Fasos në fund të muajit mars, por më parë ishte përfolur se do të luajë për Shqipërinë.
Sipas Panuçit, ylli i Genkut kishte zgjedhur Shqipërinë, por më pas ndikoi babai i tij që të kalojë te Kosova.
“Kemi biseduar me lojtarin. Ishte i gatshëm të vinte me Shqipërinë. Në momente të tilla, prindërit në shumë raste janë shkatërrimi i fëmijëve të tyre edhe si lojtarë. Kaq dhe pikë”, është deklarata e ashpër që ka dhënë Panuçi në konferencën për media.
Ai ndërkaq ja ka mbyllur përfundimisht derën Zhegrovës .
“Nëse dikush i thotë një herë jo për kombëtare, nuk vjen më kurrë sa të jem unë trajner”, ka deklaruar ai.
Talenti 18-vjeçar i cili ka lindur në Herford të Gjermanisë, luan si mesfushor ofensiv te skuadra belge, Genk.
Si i ri ai është angazhuar te Flamurtari, Prishtina, pastaj te Standard Liege në vitin 2015 dhe për dy sezone të tjera te Sint-Truidense. /tesheshi.com/
