Trajneri i Kombëtares së Shqipërisë, italiani Cristian Panucci e konsideron me fat veten që po stërvit përfaqësueses kuq e zi e jo Italinë.
Duke shprehur keqardhje për mungesën e kombëtares axurre në Botëror, Panucci theksoi se eleminimi nuk është problemi i vetëm i Italisë. “Si italian më vjen shumë keq. Por problemi është më i madh nga ç’mendohet, nuk është vetëm eliminimi, është një sistem që nuk funksionon, që nga të rinjtë. Gjermania në vitin 2006 kur humbi Botërorin, nisi të ndërtonte sektorin e të rinjve. Në futbollin italian ka shumë vështirësi, sepse shumë njerëz të aftë nuk i lënë të punojnë”- është shprehur Panucci gjatë një konference për shtyp që organizoi në Tiranë. “Shpesh lodhesh të trajnosh në Itali. Unë jam shumë me fat, sepse kam një federatë dhe president që më lë të punoj dhe në fund do më gjykojë”- ka shkuar më tej trajneri i kuq e zinjve.
Duke vlerësuar ndeshjen kundër Turqisë që Shqipëria e fitoi 2-3, Panucci bëri të qartë edhe disa koncepte mbi të cilat do të punojë në vijim. “Po ndjek edhe 5-6 lojtarë të tjerë, janë kryesisht të rinj në moshë, e ndoshta në ndeshjen e rradhës, mund të grumbulloj 2-3 prej tyre. Kemi 6 muaj kohë për të përgatitur grupin, me të cilin do të synojmë kualifikimin për në Europian. Jam shumë i kënaqur nga të rinjtë dhe kemi një bazë kualiteti të mirë” – ka thënë mes të tjerash Panucci.
Pavarësisht se Hysaj po luan prej kohësh në krahun e majtë të mbrojtjes më Napolin, trajneri e përjashton kategorikisht që ai të luajë edhe me Kombëtaren në atë krah. “E dimë që Hysaj mund të luajë edhe në të majtë, por kam shumë besim te Lenjani, Aliji, Memolla. Uroj që Aliji të gjejë skuadër në janar, besoj shumë te ai. Nëse s’kemi asnjë nga këta, mund të vë dhe Veselin majtas. Për momentin Hysaj nuk preket nëse vazhdon të punojë mirë, por në kombëtare s’e ka vendin të sigurt askush” – ka bërë të qartë trajneri i Shqipërisë. /tesheshi.com/
