Pak orë pas shkarkimit, trajneri italian Christian Panucci morri avionin për në Romë, duke lënë pas dhe disa përshtypje. Gjatë një intervistë për Top Channel, me gjuhë të përmbajtur, Panucci tha se e kishte pranuar pa asnjë diskutim vendimin e Dukës.
“Ishte një vendim i presidentit dhe unë e pranoj. Ka qenë një eksperiencë fantastike dhe falënderoj të gjithë Shqipërinë. Punova në qetësi të plotë falë presidentit Duka, por në fund rezultatet nuk ishin të mira dhe presidenti vendosi që të më largojë. Ishte diçka shumë e rëndësishme që të isha trajner i një kombëtareje, për këtë arsye i detyrohem të gjithëve një Faleminderit”, tha Panucci. Ai mbajti përgjegjësinë për rezultatet e dobëta të kombëtares, por tha se dhe ai vuan porsi publiku.
“Ka gjithmonë një fajtor dhe në këtë rast unë jam përgjegjës. Njerëzit kur humbet Shqipëria vuajnë, në fakt vuaj edhe unë. Gjithsesi kam shumë respekt për të gjithë shqiptarët. I kam falendëruar sot në mëngjes të gjithë lojtarët për gjithçka që më kanë dhënë deri në momentin e fundit. Uroj që të bëjnë gjëra të mira do të jenë gjithmonë në zemrën time”.
Shkarkimi i Panuccit erdhi pas humbjes 0-2 me Turqinë në “Loro Boriçi”. /tesheshi.com/
