Para ndërtesës së ambasadës së Myanmar-it në Nju Jork është mbajtur një demonstratë, ku u mblodhën disa dhjetëra protestues të cilët dënuan dhunën dhe sulmet e ushtrisë së këtij vendi ndaj muslimanëve Rohingya në Arakan.
Demonstruesit mbanin pankarta si “Stop vrasjes së Rohingya”, “Stop gjenocidit”, “Të drejtat e Rohingya janë të drejta të njeriut”, “Nuk duhet të heshtim”, “Heshtja është miratim”.
Një nga pankartat në Nju Jork ishte “Ruanda, Bosnja, dhe tani Burma. Stop gjenocidit në Rohingya”.
Agjencia për Refugjatë e Kombeve të Bashkuara llogarit se 270,000 muslimanë Rohingya kanë kaluar kufirin drejt Bangladeshit, që kur ka shpërthyer dhuna në Myanmar-in fqinj, në fund të muajit të kaluar.
Në një valë të re sulmesh në fshatrat muslimane në Arakan, ushtria e Myanmar-it dhe militantët budistë kanë djegur dhjetëra sosh që nga 25 gushti dhe kanë vrarë një numër të madh fshatarësh.
Autoritetet e Myanmar-it nuk lejojnë futjen e organizatave ndërkombëtare në Arakan, andaj bilanci i saktë i dëmeve dhe pasojave të sulmit ndaj pakicës muslimane lokale janë ende të panjohura.
Organizatat jo-qeveritare lokale nga Arakan raportojnë se të paktën 1 mijë muslimanë janë vrarë në sulme gjatë ditëve të fundit, kurse disa burime thonë se ka më shumë se mijëra të vrarë. /tesheshi.com/
