Nga Bashkim Kastrati
Një fëmijë i komunitetit rom rreth 15 muajsh ka vdekur nga fruthi. Zyrtarë të Qendrës Klinike Universitare të Kosovës (QKUK) kanë bërë të ditur se fëmija ishte pranuar tri ditë para se të vdiste në Klinikën Infektive .
Sipas mjekëve, gjendja e rënduar e fëmijës ishte pasojë edhe e faktit se ai nuk ishte i vaksinuar fare.
Duke marrë parasysh këtë rast mjekët e Klinikës Infektive kanë bërë apel që fëmijët të dërgohen për vaksinim, pasi në të kundërtën mund të përfundojnë me pasoja fatale për fëmijët.
Zyra për Informim e QKUK-së ka deklaruar se edhe përkundër përkujdesjes së vazhduar nga stafi shëndetësor të Klinikës Infektive në QKUK, fëmija në fjalë nuk ka mundur të shpëtojë.
36 raste me fruth po trajtohen në Klinikën Infektive
Ky rast ka ndezur alarmin dhe sot drejtuesit e Shërbimit Spitalor Klinik Universitar kanë vizituar Klinikën Infektive për të parë nga afër gjendjen e fëmijë të tjerë që janë të prekur nga fruthi dhe kushtet t trajtimit të tyre.
Ushtruesi i detyrës i Drejtorit të Përgjithshëm i Shërbimit Spitalor dhe Klinik Universitar të Kosovës (SSHKUK), dr.Basri Sejdiu, ka vizituar Klinikën Infektive për tu njohur nga afër me gjendjen, pas raportimit të kësaj klinike në lidhje me rastet e reja të raportuara me fruth.
Në takim me drejtorin dhe kryeinfermierin e kësaj klinike, Naser Rrustemi, ai u njoftuar për numri e rasteve të mjekuara deri tani dhe për masat që kjo klinikë ka ndërmarrë për të menaxhuar situatën.
“Dr. Hamdi Ramadani, drejtor i kësaj klinike, njoftoi se momentalisht në këtë klinikë janë duke u mjekuar 36 raste me fruth, prej tyre 4 janë në gjendje më të komplikuar, përderisa 75 raste të tjera pasi kanë marrë ndihmën mjekësore, pas trajtimit janë liruar për në shtëpi. Sipas tij, pacientët janë të moshave të ndryshme, duke filluar nga foshnjat e deri tek mosha 40 vjeçare”, njofton zyra për informim e SSHKUK.
Ushtruesi i detyrës së drejtorit të përgjithshëm falënderoj stafin për punën dhe angazhimin e treguar për të ofruar ndihmesën shëndetësore për rastet e paraqitura.
Ai premtoi se do të angazhohet bashkë me bordin drejtues dhe Ministrinë e Shëndetësisë që të përmirësohet gjendja qoftë për sa i përket furnizimit me barna dhe material shpenzues, por edhe infrastrukturën dhe pajisjet e nevojshme.
Fruthi ose morbilli, e njohur edhe si e “keqja e vogël”, është sëmundje ngjitëse virale, që klinikisht përcillet me temperaturë të lartë, me shenja të shprehura katarrale dhe paraqitjen e ekzantemës nëpër lëkurë dhe enantemës në mukoza. Fruthi zakonisht atakon moshat minore, por mund të paraqitet edhe tek të rriturit. Fruthi përhapet përmes spërklave të ajrit dhe para përdorimit të vaksinës, sëmundja është paraqitur në formë epidemike çdo 2-5 vite. Pas aplikimit të vaksinës, incidenca e kësaj sëmundje është zvogëluar, por herë pas here paraqiten epidemi në popullatën joimune.
Sipas infektologëve, mjekimi i sëmundjes kërkon përdorimin e masave higjeniko-sanitare dhe mjekim simtomatik. Pacientët duhet të qëndrojnë në dhoma të veçanta, në qetësi, dhe dhoma duhet të ajroset sa më shumë. Fëmijët nuk duhet të shkojnë në shkollë ose në çerdhe.
Ndryshe, vaksina e parë kundër fruthit është licencuar në Shtetet e Bashkuara më 1963 dhe sot është botërisht e përfshirë në programin rutinë të imunizimit të fëmijëve në vendet e zhvilluara.
Në Kosovë, vaksinimi i obliguar kundër fruthit ka filluar në vitin 1971, i cili e ka përmirësuar shumë gjendjen epidemike me këtë sëmundje.
Por, përkundër kësaj, Kosova ka pasur një shkallë më të lartë të vdekshmërisë nga kjo sëmundje, në krahasim me vendet e rajonit.
Në vendet e pazhvilluara, fruthi është një nga problemet kryesore shëndetësore për fëmijët, ku për shkak të komplikimeve në sistemin nervor qendror dhe sistemin respirator, vdekshmëria arrin deri në 20 për qind. /tesheshi.com/
