Një tërmet i fuqishëm me magnitudë që për momentin raportohet të ketë qenë 6.6 ballë të shkallës Rihter goditi të njëjtën zonë në jug dhe në qendër të Italisë, goditur edhe nga tërmeti i 24 gushtit dhe nga disa paslëkundje javën e shkuar. Goditja raportohet të ketë shembur përfundimisht ndërtesat që u kishin rezistuar lëkundjeve të mëparshme, pas një jave ku toka ka qenë vazhdimisht në lëvizje e që ka lënë me mijëra persona pa shtëpi.
Kreu i agjencisë së mbrojtjes civile italiane, Fabrizio Curcio, tha se nuk ka njoftime të menjëhershme për raste viktimash, mirëpo disa persona kanë pësuar lëndime të rënda pasi një numër i konsiderueshëm ndërtesash janë shembur.
Banorët e zonës tashmë të tronditur nga një lëkundje të vazhdueshme të tokës kanë marrë rrugën duke dalë në sheshe dhe zona të hapura. Shumë prej tyre e kanë kaluar natën në makina ose ishin evakuuar në streha të përkohshme apo hotele në zona të tjera pas një serie të fortë lëkundjes që ndodhën të mërkurën e kaluar.
Imazhet televizive tregojnë murgeshat që nxitojnë jashtë kishave të tyre në sheshin qendror në Norcia ndërsa kulla e sahatit duket se do të shembet nga moment në moment. Një prej grave u desh të nxirrej jashtë nga zjarrfikësit.
Kryebashkiaku i qytetit të goditur nga tërmeti Ussita tha se një re e madhe tymi u pa të dilte nga ndërtesat e shkatërruara. “Eshtë një katastrofë, një katastrofë”, tha kryebashkiaku Marco Rinaldi për agjencinë e lajmeve ANSA . “Unë isha duke fjetur në makinë dhe pashë ferrin”.
Një tjetër qytet i goditur rëndë, Castelsantangelo sul Nera, gjithashtu ka pësuar shkatërrime të reja.
Në Arquata del Tronto, që u shkatërrua nga tërmeti i 24 gushtit që vrau mbi 300 njerëz, gjithashtu ka pasur lëkundje. Kryebashkiaku Aleandro Petrucci tha se nuk kanë mbetur më qytet. “Gjithçka është rrënuar”.
Tërmeti është ndjerë në të gjithë gadishullin italian, me raportime për lëkundje deri në Bolzano apo në jug deri në Bari. Banorët kanë dalë nëpër rrugë në Romë, ku pallatet antike janë lëkundur fort në pritje të një mrekullie për të mos u shembur.
Organizata qeveritare e Austrisë që monitoron tërmetet tha se lëkundjen janë ndjerë në shkallë të ndryshme në lindje dhe në jug të këtij vendi deri në qytetin e Salzburgut. Banorët e zonës kanë ndjerë lëvizjen e tokës dhe të objekteve sipër saj.
Ndërtesa të tëra janë shembur në disa qytete dhe sipas autoriteteve italiane tashmë ekipet e emergjencave po përpiqen të saktësojnë nëse ka njerëz nën rrënoja.
Në Norcia, kisha që i mbijetoi tërmetit të gushtit dhe pas lëkundjeve të javës së shkuar, është ende në këmbë, por fotografitë tregojnë se grumbuj gurësh kanë rënë në themelet e saj. Një nga gurët ka rënë deri në disa metra në qendër të sheshit, si një ilustrim i forcës së tërmetit.
Autoritetet po përpiqen të ruajnë qetësinë mes popullsisë.
Qendra sizmiologjike euro-mesdhetare e raportoi magnitudën e tërmetit në 6.6 apo 6.5 ballë të Rihterit me epiqendrën 132 kilometra në verilindje të Romës dhe 67 kilometra nga Perugia, në afërsi të epiqendrës së goditjeve të javës së shkuar.
Përgatiti: Juli Prifti – /tesheshi.com/
