Ish-Kryeministri Pandeli Majko, një shtetas edhe i Kosovës, përveç se një bujtës i rregullt i Prishtinës (aty jeton i vëllai), ka nisur disa takime në Parlamentin e Kosovës, ku ka folur për reflektim mes palëve dhe për të zgjidhur krizën politike.
Majko u takua sot me kreun e Kuvendit të Kosovës, Kadri Veseli, dhe nga komunikata e shpërndarë, jepet një mesazh që çon drejt mundësisë që Majko të nisë takimet mes palëve për të zgjidhur krizën e gjatë dhe të rëndë të politikës në Kosovë, e cila ka bllokuar institucionet.
Pikërisht, në komunikatën e lëshuar nga zyra e kryeparlamentarit Veseli theksohet: “Lidhur me zhvillimet aktuale në skenën politike të Kosovës, ishte dakordim i përbashkët nevoja e komunikimit midis subjekteve politike, i cili do t’i hapte rrugë arritjes së një konsensusi të përbashkët, në të mirë të qytetarëve të Kosovës dhe përmirësimit të jetës sociale e ekonomike të tyre, zhvillimit të shtetit ligjor dhe demokracisë parlamentare.
Ish-kryeministri Majko, nga ana e tij, tha se çdo vizitë në shtëpinë e tij të dytë, siç e konsideroi ai Kosovën, përcillet me emocion të veçantë, ndërsa këtë radhë, edhe me shqetësim për situatën e krizës politike në Prishtinë, e cila shpesh herë, sipas tij, eksportohet si kulturë nga Tirana zyrtare. Por, ai u shpreh i bindur se gjërat do të shkojnë në drejtimin e duhur.
Ne kemi një varg shumë të bukur te Himni Kombëtar, ‘Rreth flamurit të përbashkuar’. Mendoj se 28 nëntori nuk është një festë që nxit ndarje, por nxit bashkëpunim dhe negociata, sepse shqiptarët kanë ditur që në momentet më të vështira për vendin të falin edhe gjakun, e jo më të tejkalojnë inatet politike të natyrave të ndryshme, nga më të drejtat, deri në më të gabuarat. Festa e 28 Nëntorit na fton të reflektojmë”, theksoi Majko.
Pra, Majko, në festën e 28 nëntorit do të jetë në Prishtinë, kur opozita ka shpallur dhe manifestimin e madh. Përveç festës në familje, nuk përjashtohen dhe takime e negociata. E në fakt ish-Kryeministri Pandeli Majko, gëzon respektin e të gjitha forcave politikë ne Kosovë.
/tesheshi.com/
