Skandali ndërkombëtar i pastrimit të parave të politikanëve, biznesmenëve dhe njerëzve të rëndësishëm që u publikua mbrëmë përfshin edhe Shqipërinë.
Siç është mësuar, një grup gazetarësh ndërkombëtarë kanë zbardhur disa aktivitete financiare të disa prej ish-liderëve dhe krerëve aktualë botërorë. Ndërkaq, qeveria panameze është treguar e gatshme për të bashkëpunuar në këtë rast.
Dosja në fjalë përbëhet nga 11.5 milionë dosjet sekrete për një total prej 2.6 – e-mail, PDF files – të një periudhe prej 1970 dhe deri në pranverën e vitit 2016.
Dokumentet tregojnë se si kjo kompani ndihmon klientët e vet që t’i shmangen taksave dhe të pastrojnë para; japin informacion mbi liderët aktualë dhe ish-liderët, si dhe të famshëm të tjerë, si fjala vjen Messi, të cilët u shmangen taksave me ndihmën e kompanive jashtë vendit si dhe aktivitetet e paligjishme me të cilat pastrojnë para.
Në aferën e skandalit të parave të fshehura në parajsën fiskale të Panamasë është përmendur edhe Shqipëria, gjatë një hetimi të një medie izraelite. Si emër i parë ka dalë një biznesmen hebre që thekson se ka investuar në fushën e karburanteve.
E përditshmja prestigjoze The Guardian, gjermania Sueddeutsche Zeitung dhe izraelitja Haaretz.com, bën të ditur në shkrimin e saj për paratë e fshehura në Panama se në mesin e tyre është edhe një shtetas shqiptar i cili ka dy emra, një të regjistruar në Shqipëri dhe një jashtë.
Haaretz.com ka zbuluar emrin e një biznesmeni izraelit që ka investuar në Shqipëri në çështje teknologjisë.
Bëhet fjalë për një biznes të quajtur GFI Technologies i regjistruar në maj të 2013-s në ishullin Anguila, për të investuar në Shqipëri në kompanitë shqiptare të teknologjisë së lartë.
Në shkrim përmendet emri i një avokati të quajtur Assaf Halkin, ku theksohet që është shtetas shqiptar dhe në vendin tonë njihet me emrin Ismail Mulati.
Ai, së bashku me një firmë kanadeze, Global Fluids International S.A, janë pronarët e kompanisë GFI Technologies.
Mulati nuk iu përgjigj pyetje së Haaretz.com në lidhje me investimet e kompanisë, por komentoi se qëllimi i biznesit është për të shitur pajisje teknologjike në fushën e karburanteve dhe shtoi se të gjitha të ardhurat raportohen në organet tatimore izraelite.
Po çfarë është GFI Technologies?! Ajo është një kompani që ka fituar një konçension shtetëror në vitin 2013 nga qeveria shqiptare. Është pikërisht e shumëpërfolura kompani që merret me ngyrosjen e karburanteve në mënyrë që nafta dhe benzina të treg të jenë të kontrolluar dhe mos hyjnë kontrabandë.
Ajo ka edhe një faqe internet në gjuhën shqipe, gfi-albania.com, ku ka të publikuar punën e saj në markimin e karburanteve.
“Dëshirojmë t’i bëjmë me dije opinionit publik se GFI Albania, një shoqëri e specializuar në markimin dhe monitorimin e hidrokarbureve, ndërpreu punën në Shqipëri më 10 Dhjetor 2015 si pasojë e mospërmbushjes së detyrimeve kontraktuale nga ana e Autoritetit Kontraktues (Ministria e Financave). Kushtet e marrëveshjes konçesionare të GFI Albania me Autoritetin Kontraktues parashikonin markimin dhe monitorimin e karburanteve si dhe të naftës bruto, por Autoriteti nuk respektoi detyrimin ligjor dhe kontraktual të markimit të naftës bruto. Për rrjedhojë, GFI Albania ka punuar që nga viti 2013 vetëm me 30% të kapacitetit të planifikuar. Megjithë humbjet financiare të akumuluara gjatë këtyre dy viteve, ne jemi krenarë për kontributin tonë në luftën kundër evazionit fiscal”.
Kështu thuhet në një deklaratë publike të kompanisë që botohet në faqen e internetit.
Ky konçension ka kushtuar rreth 300 milionë euro me objektivin që të ulë kontrabandën dhe evazionin në këtë fushë, pra që të rrisë të ardhurat nga diganat dhe akziat e arkëtuara nga importi dhe shitja e hidrokarbureve.
Por çdo vit raportohen ulje si pasojë e korrupsionit dhe informalitetit.
Përgatiti: Ylli Pata – /tesheshi.com/
