Ministri i Drejtësisë, z. Ylli Manjani i është përgjigjur sot interesit të medias lidhur me çështjen “Panama Paper”, ku ndër të tjera bëri me dije se është i gatshëm për të propozuar përgatitjen e një ligji i cili do të detyrojë të gjitha kompanitë e huaja që duan të investojnë në Shqipëri, të bëjnë publike listën e aksionerëve.
“Ministria e Drejtësisë do të përgatisë një ligj që të detyrojë të gjitha kompanitë e huaja që duan të investojnë në Shqipëri, të bëjnë publike listën e aksionerëve dhe për këtë do të do të ndiqet modeli gjerman. Mbështes 100 përqind nismën e Ministrit të Republikës Federale të Gjermanisë, që është prezantuar dje dhe që është një nismë shumë interesante. Çështja e kompanive “offshore” është një çështje globale dhe nuk ka lindur në Shqipëri”, – tha Manjani.
Ai shtoi se sipas këtij ligji që ka propozuar ministri gjerman, kushdo nga kompanitë “offshore” që investon duhet të bëjë publik emrat e aksionerëve.
“Një ligj të tillë jam gati ta bëjë edhe unë, ekspertët e Ministrisë së Drejtësisë. Kemi nisur punën për të verifikuar mundësinë se kudhe ç’pjesë të legjislacionit do të ndërhyjmë, pra jemi në një fazë ende paraprake dhe bashkë me ekspertët e huaj dhe ata të Ministrisë së Financave, ndoshta edhe me të tjerë eskpertë, kryesisht të pastrimit të parave, do të jemi në gjendje që të japim një legjislacion modern, që do t’i përgjigjet sfidave të kohës”, – deklaroi ministri.
Më tej numri një i drejtësisë i shprehu gjithë mbështetjen e tij Prokurorisë së Përgjithshme për të bërë hetime të plota dhe të qarta dhe për të sqaruar në radhë të parë opinionin publik apo edhe këdo që administron para apo elementë të ekonomisë kombëtare në mënyrë jo transparente. /tesheshi.com/
