Burimi anonim pas rrjedhjes së informacionit në skandalin “Panama Papers” flet për herë të parë, duke u ofruar ndihmë autoriteteve ligjore për të proceduar të dyshuarit, në këmbim të imunitetit. Në një deklaratë prej 1800 fjalësh, “John Doe” tregon se nuk ka punuar asnjëherë për ndonjë agjenci spiunazhi apo ndonjë qeveri. Ai e nis deklaratën duke cituar ndjeshmërinë ndaj “pabarazisë së të ardhurave”, si motiv të veprimit të tij.
“Panama Papers” nxori në shesh sesi njerëzit e pasur përdorin firma jashtë territorit të shteteve të tyre për të shmangur taksat dhe sanksionet që sjell një gjë e tillë. Dokumentet i përkasin firmës ligjore “Mossack Fonseca” e cila ka mohuar se ka bërë shkelje dhe thotë se është viktimë e një hakerimi.
Dokumentet u investiguan nga qindra gazetarë nga mediat më të mëdha të botës, që punuan në mënyrë të fshehtë së bashku me Konsorciumin ndërkombëtar të gazetarëve investigativë me muaj të tërë.
Dokumentet nxorën në pah asetet e fshehura të qindra politikanëve, zyrtarëve, liderëve aktualë apo të mëparshëm të botës, yjeve të famshëm të artit dhe atyre të sportit.
Në listë janë më shumë se 200 mijë kompani, fondacione dhe truste të vendosura në parajsat fiskale nëpër botë.
Deklarata e John Doe vjen pak përpara se presidenti Barack Obama të jepte një adresim për ekonominë, në të cilin citonte “Panama Papers” si një theksim të problemit të korrupsionit dhe evazionit të taksave.
Ai tha se Shtetet e Bashkuara do t’u kërkojnë bankave të identifikojnë ata që qëndrojnë pas kompanive në dhe të huaj. Obama tha se veprimet e administratës së tij do të lejonin që të bëhej një punë më e mirë në dhënien e sigurisë se të gjithë njerëzit paguajnë taksa.
Edhe pse deklarata mban emrin John Doe, gjinia e burimit nuk bëhet e ditur. Në deklaratën “Revolucioni do të dixhitalizohet”, John Doe nis duke thënë: “Pabarazia e të ardhurave është një nga çështjet përcaktuese të kohës sonë”.
Ai shton se bankat, rregullatorët financiarë dhe autoritetet e taksave kanë dështuar. Janë marrë vendime që kursejnë të pasurit ndërsa veprimet fokusohen kryesisht tek qytetarët më të ardhura të pakta ose të mesme.
Sipas tij, me mijëra procedime mund të dalin nga “Panama Papers” vetëm nëse organet e zbatimit të ligjit të mund të aksesojnë e të vlerësojnë dokumentet. Ai shton se personat si ai vetë që ekspozojnë keqbërës për të cilët nuk ka dyshime, të brendshëm apo të jashtëm qofshin, meritojnë imunitet nga përndjekjet e qeverive.
Duke iu përgjigjur spekulimeve për identitetin e tij, John Doe thekson në deklaratë se sa për dijeni, nuk punon për ndonjë qeveri apo agjenci inteligjenve, direkt apo si kontraktor dhe asnjëherë nuk ka pasur të bëjë me to.
Përgatiti: Juli Prifti – /tesheshi.com/
