Nga Entela Canaj
Është hapur në Tiranë edicioni i 6-të i Panairit ‘Work and Study’, me pjesëmarrjen e 40 kompanive dhe rreth 2 mijë ofertave të punës. Ndonëse organizatorët dhe qeveritarët i quajnë të suksesshme 5 edicionet e para të këtij panairi, vetë punëkërkuesit dhe studentët kanë shumë pak besim se mund të gjejnë vërtet një punë në evente të tilla. Por me gjithë këtë skepticizëm, ata nuk ngurrojnë të provojnë të aplikojnë dhe të lënë numrat e kontaktit në pritje të një telefonate që nuk dihet nëse do të vijë.
Vendet e punës
Shumica e vendeve të punës që ofrohen në këtë panair janë në call-center, tek-tuk ndonjë bankë që kërkon punonjës marketing, dhe pjesa tjetër janë shkolla dhe universitete private që prezantojnë ofertat e tyre të studimit duke qenë se jemi në prag të fillimit të vitit të ri akademik.
Nga 40 kompani pjesëmarrëse, pothuajse gjysma (17 të tilla) janë institucione të arsimit privat. Tjetër stendë që të bën përshtypje në këtë panair janë edhe agjencitë e punësimit për në Gjermani. Ndonëse ndryshe nga azilkërkimi kjo është një mënyrë e rregullt emigrimi, sërish nxit të rinjtë shqiptarë që të largohen nga vendi.
Punëkërkuesit
Arlindi 25 vjeç nga Tirana thotë se ka kohë që është diplomuar si jurist, por nuk ka mundur të gjejë punë në profesionin e tij, pasi të gjithë i kërkojnë mik apo para…, ndaj dhe panairi i ka mbetur si shans i vetëm për ta provuar. “Erdha një herë të aplikoj, por të shohim, nuk e di, s’ka shumë besim se do gjej por ç’të dal, do e pranoj, edhe jashtë profesonit.”
Ndërsa Qemali, 50 vjeç, një ish-kuzhinier, thotë se ka mbetur pa punë, dhe ka aplikuar në disa panaire vit pas viti. “Nuk kam gjetur punë në profesionin tim edhe pse duket sikur ka. Kam përshtypjen mosha ndikon, tani duan të rinj, por unë jam i gatshëm të punoj edhe diçka tjetër që t`i përshtatet moshës sime, mjafton të gjej një punë. Megjithatë nisur nga eksperienca mendoj se këto panaire janë më shumë një reklamim i këtyre kompanive që vijnë prezantohen këtu, dhe shumë pak vende pune ofrohen në të vërtetë”, thotë ai.
Organizatorët
Nikolin Jaka, kreu i Dhomës së Tregtisë dhe Industrisë, i quajti një sukses të gjtha edicionet e panaireve ‘Work and study” të mbajtura në Shqipëri, ku siç tha ai, ka pasur vit pas viti 2 mijë deri në 3 mijë vende pune të ofruara dhe mbi 6 mijë vizitorë e aplikime. “Në 2014-tën ne patëm 35 kompani pjesëmarëse në panair, dhe 1800 vende pune të ofruara në panair, dhe mbi 5 mijë aplikime për punësim, dhe po vijmë te viti 2015 në edicionin i 6-të, ku kemi 40 kompani pjesëmarrëse në këtë event. Unë do doja t`u bëja një thirrje gjithë studentëve dhe punëkërkuesve po asht,u edhe gjithë kompanive dhe universiteteve shqiptare, se Shqipëria i ka mundësitë dhe potencialet reale për të mundësuar një ekonomi dhe për të mundësuar një proces në zhvillim të saj në mënyrë që të rris integrititetin, të rris standardet dhe qëndrueshmërinë e cilësisë së jetës,” tha Nikolin Jaka, kreu i Dhomës së Tregtisë.
Ministria
Ndërsa ministri i Mirëqenies Sociale Blendi Klosi bëri të ditur se shumë shpejt në Parlament do të paraqiten disa projektligje që kanë të bëjnë me arsimin profesional dhe me përmirësimin e tregut të punës. “Shumë shpejt do paraqesim në Parlament një paketë të plotë të legjislacionit, për të rregulluar raportin ndërmjet arsimit profesional dhe tregut të punës. Pra do të paraqesim ligjin për arsimin profesional për të pasur mundësi që të rregullojmë me ligj raportet ndërmjet arsimit profesional, mënyrës se si funksionon dhe si lidhet me tregun e punës, ligjin e zejeve, i cili do të jetë një ligj kryekëput për ata zanataçinj që jetojnë me punë të denjë, dhe ligji i tretë po aq shumë i rëndësishëm ligji i nxitjes së punësimit,” tha ministri i Mirëqenies Sociale, Blendi Klosi. Panairi do të qëndrojë i hapur për tri ditë me radhë deri në datën 2 tetor, pranë Muzeut Historik Kombëtar në Tiranë. /tesheshi.com/
