Koalicioni që doli fitues në zgjedhjet e 11 qershorit, PDK-AAK-Nisma, vazhdon ta mbajë sekret emrin e kryeparlamentarit me arsyetimin se për momentin nuk e kanë prioritet.
Zgjedhja e kryetarit të Kuvendit është hapi i parë që duhet ndërmarrë para se të mandatohet i nominuari për kryeministër. Sipas vendimit të Gjykatës Kushtetuese, me të cilin në vitin 2014 ishte rrëzuar Isa Mustafa nga kreu i Kuvendit, propozimi i kandidatit për këtë post i takon partisë apo koalicionit fitues.
Synim për ta marrë këtë post kanë shprehur serbët, duke u thirrur në shembullin e Maqedonisë.
Shefi i së ashtuquajturës Zyrë për Kosovën, Marko Gjuriq, ka thënë se serbët duhet ta kenë njërin nga tre postet kryesore, qoftë presidentin, kryeministrin apo kryekuvendarin, edhe pse ka pranuar se vështirë që mund të realizohet një gjë e tillë.
Kujtojmë se PDK-ja, AAK-ja dhe Nisma vetëm pak orë para regjistrimit të tyre si koalicion parazgjedhor zyrtarisht kishin deklaruar të jenë marrë vesh vetëm për postin e mandatarit të qeverisë, jo edhe të kryeparlamentarit.
Mbetet të shihet nëse Kadri Veseli synon sërish të bëhet kryekuvendar, apo do lëshojë rrugë për ndonjë koleg të partisë. Pa dyshim, më i përgatituri për pozitën në fjalë është Xhavit Haliti, pasi për disa vite me radhë ka mbajtur pozitën e nënkryetarit dhe ka udhëhequr shumë seanca. /tesheshi.com/
