Një video që ka nisur të qarkullojë në internet të enjten e që tregon ushtarë me uniformë teksa ekzekutojnë dy njerëz me sy të lidhur ka bërë që ushtria egjiptiane të akuzohet për vrasje pa gjyq në provincën e Sinait.
Pamjet filmike tregojnë për një të ri me sytë e lidhur që pyetet me ton të ashpër e që më pas goditet në kokë me armë nga një ushtar.
Një tjetër ushtar qëllon mbi trupin e shtrirë përdhe ndërsa dëgjohet një thirrje, “jo në kokë”.
Al Jazeera i referohet një juristi e një veprimtari për të drejtat e njeriut, Ahmed Mefreh, që i quan këto ekzekutime të barabarta me krime lufte.
“Në pamjet filmike shohim ekzekutime të njerëzve të paarmatosur nga forca me uniforma ushtarake. Ata janë goditur drejtpërdrejt. Ligji ndërkombëtar e konsideron këtë krim lufte, që qartësisht duhet hetuar,” citohet të ketë thënë ai.
Human Rights Watch i akuzoi forcat egjiptiane një muaj më parë për ekzekutimin e së paku katër personave në janarin e këtij viti.
Forcat ushtarake egjiptiane janë prej vitesh në betejë me një lëvizje të armatosur në Gadishullin e Sinait, thotë Al Jazeera. /tesheshi.com/
