Një grup gazetarësh të CNN kanë mundur të filmojnë brenda shtetit më të izoluar në Botë, Koresë së Veriut, e cila me provat e ndërmarra me raketat bërthamore, ka tensionuar situatën jo vetëm në Gadishullin Korean.
Tensionet kanë arritur kulmin në javët e fundit mes Phenianit dhe kancelarive më të rëndësishme në Botë, veçanërisht Uashingtonit.
Will Ripley, Tim Schwarz dhe Justin Robertson vizituan Korenë e Veriut në korrik, ku qëndruan 15 ditë.
Edhe pse ishin nën mbikëqyrjen e zyrtarëve qeveritarë, kishin mundësi të shihnin dhe të shkonin në vendet e ndaluara.
Pas kthimit realizuan një dokumentar që shfaq jetën e banorëve të shtetit misterioz, ku fëmijët që në fëmijëri edukohen të urrejnë amerikanët, “armiqtë e përbetuar që mund të sulmojnë në çdo çast”.
Disa nga ta i duan video-lojërat, sidomos ato ku qëllohet drejt amerikanëve. Disa më të mëdhenj, që nuk kanë parë kurrë ndonjë amerikan, thonë se armiqtë e tyre kanë hundë të madhe dhe gjoks leshator.
Fëmijët shpesh hezitonin të flisnin, sepse edukohen ta duan shtetin dhe liderin statujat e të cilit i shohin kudo.
“Kim Jong-un është i mëshirshëm dhe na do më shumë se prindërit tanë”, tha një tetëvjeçar i cili gjendej në kampin për edukimin e fëmijëve.
Gazetarët vizituan edhe Wonsanin e famshëm për peshkimin, që është edhe vendi kryesor për lëshimin e raketave, të cilat banorët i bëjnë të ndjehen krenarë.
Një nga banorët në këtë vend thotë se nuk i kupton SHBA-të, pasi vendi i tij po përpiqet të mbrojë popullsinë, ndërsa ameriikanët vendosin sanksione.
Gazetarët ishin edhe në një nga vendet më të rrezikshme në botë, kufirin mes Koresë së Veriut dhe Jugut, si dhe një dyqan suveniresh, ku ishte kartolina me mbishkrimin: “do të ndalojmë tentativën e SHBA-ve për të nisur luftë bërthamore”:
Në dokumentar mund të shihnin edhe malin e shenjtë Paekta me vullkanin aktiv dhe majën më të lartë në gadishull, ku sipas legjendës lindi Kim Jong-ili.
Banorët e besojnë këtë legjendë dhe thonë se në ditën e lindjes së tij, Dielli depërtoi nëpër re dhe lulet lulëzuan. Qielli pra transformoi natyrën, për të njoftuar lindjen e tij. /tesheshi.com/
