New York Times ka publikuar video të reja nga të cilat pretendohet të provohet se forcat ruse kanë ekzekutuar të paktën tetë civilë të burgosur ukrainas më 4 mars në Bucha, jo shumë larg Kievit.
Moska ka mohuar vazhdimisht raportet për krime lufte gjatë okupimit të qytetit. New York Times shton se ministritë e mbrojtjes dhe të jashtme të Rusisë nuk i janë përgjigjur kërkesave të reja për koment në lidhje me pamjet e reja.
“Kjo është hera e fundit që burrat janë parë të gjallë. Në dy video, parashutistët rusë i detyrojnë ata të ecin nën kërcënimin e armëve në një rrugë në Bucha, një periferi të Kievit. Disa nga të burgosurit ukrainas janë përkulur, duke mbajtur rripat e atyre që kanë përpara. Të tjerët i kanë duart mbi kokë.
“Ecni djathtas, kurva”, urdhëroi një nga ushtarët.
Pamjet, të marra nga një kamera sigurie dhe një dëshmitar në një shtëpi aty pranë më 4 mars dhe të siguruara nga New York Times, janë prova më e qartë deri më tani që burrat ishin në paraburgimin e ushtarëve rusë disa minuta para ekzekutimit.
“Ka pengje të shtrirë, ngjitur me gardhin”, thotë personi që ka regjistruar njërën nga videot.
Ai numëron:
“Një, dy, tre, me siguri, katër, pesë, gjashtë… Janë arrestuar gjithsej nëntë persona”.
Burrat detyrohen të shtrihen në tokë, duke përfshirë një të veshur me një xhup të veçantë blu të hapur me kapuç. /tesheshi.com/
