Që në fillim të kësaj vere, një robot humanoid i fuqizuar nga inteligjenca artificiale, i aftë për të kryer veprime të thjeshta dhe të përsëritura pranë njerëzve, mund të shfaqet në treg. Falë një investimi prej 23.5 milionë dollarësh nga kompania amerikane OpenAI, e cila qëndron pas ChatGPT, prodhuesi norvegjez i robotëve humanoidë 1X Technologies ka zhvilluar EVE, një android komercial që do të revolucionarizojë tregun e punës.
Për çfarë është EVE?
EVE është krijuar për të lëvizur dhe manipuluar në mënyrë delikate gjërat dhe për të bashkëvepruar me njerëzit. EVE aktualisht përdor rrota për të lëvizur dhe tashmë mund të ngrejë dhe lëvizë objekte, të paketojë dhe të hapë kuti dhe me inteligjencën e duhur artificiale, si një robot humanoid dykëmbësh, mund të zëvendësojë njerëzit në forma të caktuara të punës manual si kujdesi për fëmijët ose kujdesin për të sëmurët. Në thelb, EVE do të jetë një version fizik i ChatGPT.
“1X është në krye të punës së asistuar duke përdorur teknologji të sigurta dhe të avancuara në robotikë. Fondi i Startup OpenAI beson në qasjen dhe ndikimin që 1X mund të ketë në të ardhmen e punës,” tha Brad Lightcap i OpenAI.
1X Technologies u themelua në vitin 2014 dhe aktualisht ka 560 punonjës në mbarë botën. Pas investimit të lartpërmendur, 1X ftoi ekspertë të inteligjencës artificiale të të gjitha formave që t’i bashkohen në zhvillimin e androidit në faqen e saj të internetit.
Përveç robotit EVE, i cili është projektuar për aftësi të sakta motorike dhe i fokusuar në punën fizike me ndihmën e VR dhe operatorëve, kompania norvegjeze filloi gjithashtu zhvillimin e NEO, i cili si një robot humanoid do të përdorë maksimalisht inteligjencën artificiale në momente të paimagjinuara.
Të ardhurat nga shitja e EVE do të përdoren për zhvillimin dhe përmirësimin e NEO dykëmbësh.
“Ai nuk do të ngecë në një rrugë, por do të mendojë”
“Kjo lloj inteligjence artificiale gjeneruese do të jetë absolutisht transformuese për dy problemet që kemi aktualisht me robotët – që ata janë mjaft budallenj dhe se ata nuk e kuptojnë gjithmonë atë që duam. Falë modeleve të mëdha gjuhësore si GPT-4, robotët do të jenë në gjendje të veprojnë në mënyrë shumë më dinamike dhe të reagojnë ndaj ndryshimeve në mjedis. Kështu ata nuk do të ngecin në rrëmujën e një skenari, por mendojnë për hapat që duhet të ndërmerren për të arritur qëllimin e vendosur nga përdoruesi,” shpjegoi George Strakhov, një ekspert marketingu dhe strategjie, i cili është i bindur se njerëzit në të ardhmen e afërt do të jenë në gjendje të kenë një bisedë të dyanshme dhe kuptimplotë me robotët.
Gjithashtu, sinteza realiste e zërit, grimasat e fytyrës dhe shprehja e emocioneve do ta bëjnë komunikimin me robotë shumë më të pranueshëm dhe më të këndshëm për njerëzit, thekson Strakhov.
Microsoft ka investuar 10 miliardë dollarë në OpenAI.
Çfarë thotë Microsoft?
“Ne duam t’i ndihmojmë njerëzit të komunikojnë më lehtë me robotët, pa pasur nevojë të mësojnë gjuhë programimi komplekse ose detaje të sistemeve robotike. Sfida kryesore është të mësojmë ChatGPT të zgjidhë problemet duke marrë parasysh ligjet e fizikës, kontekstin e mjedisit te punës dhe se si veprimet fizike të robotit mund të ndryshojnë gjendjen në botë”, njoftoi Microsoft.
Ky investim hap rivalitetin e OpenAI-t dhe konkurrencën në treg me robotin Tesla të Elon Musk, i cili nuk është ende gati për prodhim.
Vitin e kaluar në Palo Alto, Musk zbuloi atë që ai e përshkroi si një “robot zhvillimor” që ecte pa asnjë mbështetje të jashtme. Musk tha se pret që ky robot të dalë në shitje pas tre deri në pesë vjet, që do të thotë se EVE do të bëhet androidi i parë humanoid i disponueshëm komercial. /tesheshi.com/
