Një anije kozmike ushtarake amerikane u ul të shtunën në Qendrën Hapësinore Kennedy në Florida pas gati dy vjet e gjysmë në orbitë, njoftoi Boeing.
Anija hapësinore pa pilot X-37B, e cila fluturoi për herë të parë në vitin 2010, ka kaluar gjithsej më shumë se dhjetë vjet në hapësirë dhe ka fluturuar më shumë se 1.3 miliardë milje gjatë gjashtë misioneve, tha Boeing.
“Ky mision nënvizon fokusin e Forcave Hapësinore në eksplorimin bashkëpunues të hapësirës dhe zgjerimin e aksesit me kosto të ulët në hapësirë për partnerët tanë, brenda dhe jashtë Departamentit të Forcave Ajrore,” tha gjenerali Chance Saltzman, shefi i operacioneve hapësinore.
I lançuar në fshehtësi, X-37B u projektua për Forcat Ajrore nga United Launch Alliance – një sipërmarrje e përbashkët midis Boeing dhe Lockheed Martin.
Është 9 metra i gjatë, ka një hapje krahësh rreth 4.5 metra dhe mundësohet nga një panel diellor.
Përpara nisjes së fundit të anijes, në maj 2020, Pentagoni tha se anija kozmike do të kryente një sërë eksperimentesh shkencore.
Misioni ishte të testonte se si materiale të caktuara reagojnë në hapësirë, të vlerësonte se si rrezatimi i ambientit në hapësirë ndikon në një shumëllojshmëri farash dhe të transformonte rrezatimin diellor në energji radio-elektrike, tha ai. /tesheshi.com/
