Prej orësh, ushtarë ukrainas po evakuohen nga uzina e çelikut Azovstal. Disa prej tyre janë të plagosur rëndë.
Zëvendësministrja ukrainase e Mbrojtjes Anya Maliar tha se 53 ushtarë u evakuuan në spitalin në Novoazovsk, i cili është nën kontrollin e forcave ruse. 200 ushtarë të tjerë u transportuan nga një korridor humanitar në Olenivka, i kontrolluar nga rebelët pro-rusë.
Një shkëmbim i mundshëm i të gjithë luftëtarëve ukrainas të evakuuar dhe të burgosurve rusë do të pasojë, shtoi ajo.
Ushtria ukrainase thotë se po punon për të evakuuar të gjithë ushtarët e mbetur nga uzina e çelikut.
“Komanda e Lartë Ushtarake ka urdhëruar komandantët e njësive të vendosura në Azovstal të shpëtojnë jetë njerëzish”, shtohet në deklaratë.
Rreth 600 ushtarë mendohet se kanë qenë brenda fabrikës së çelikut, por është e paqartë saktësisht se sa prej tyre kanë mbetur.
“Ne shpresojmë se do të jemi në gjendje të shpëtojmë jetën e djemve tanë”, tha presidenti ukrainas Volodymyr Zelensky në një fjalim mbrëmë. /tesheshi.com/
