Avionët luftarakë të Ushtrisë Serbe fluturuan mbi zonën pranë vendkalimit kufitar Jarinje në dy raste sot rreth mesditës, ku serbët e tubuar që bllokonin kalimin i përshëndetën me entuziazëm.
Më herët, Ministria e Mbrojtjes e Serbisë tha se tre helikopterë të Ushtrisë Serbe MI-35 do të fluturojnë mbi zonën pranë vijës administrative në vendkalimin Jarinje nga ana e Serbisë qendrore nga e enjtja.
Siç u tha, helikopterët u dërguan për qëllime parandaluese dhe monitoruan situatën e sigurisë në terren.
Nga ana tjetër, ushtria serbe aktualisht po lëviz tanket drejt kalimit administrativ të Jarinjes.
Një video e një kolone tankesh që, sipas informacioneve të pakonfirmuara, u nisën nga Rashka drejt vijës administrative me Kosovën dhe Metohinë, u shfaq në rrjetet sociale.
Bëhet fjalë për tanke të modernizuara T-72 MS të pajisura me optikë të re dhe pajisje luftarake më moderne, të cilat janë pjesë e donacionit ushtarak rus për Serbinë.
Qytetarët serbë, por më së shumti individë që janë pjesë e strukturave paralele në veriun e Kosovës kanë bllokuar rrugët që të çojnë në vendkalimet Jarinje dhe Brnjak për ditën e gjashtë me radhë në shenjë proteste ndaj vendimit të qeverisë së Kosovës për të vendosur masa reciproke të targave. /tesheshi.com/
