Luftanija më e madhe turke “TCG Anadolu”, e cila zyrtarisht iu dorëzua marinës turke javën e kaluar, u ankorua në portin e Stambollit, Sarayburnu, raporton Anadolia.
Qytetarët kanë shfaqur interesim të madh për luftanijen, e cila pritet të hapet zyrtarisht për vizitorët. Shumë shfrytëzuan rastin për të fotografuar anijen luftarake më të madhe turke me celularët e tyre nga vendet e afërta.
https://youtu.be/M0D4GDyjbgE
“TCG Anadolu” është luftanija e parë në botë në kategorinë e saj mbi të cilën mund të ulen dhe të ngrihen helikopterët më të mëdhenj dhe më të rëndë dhe mjetet ajrore pa pilot.
Turqia është një nga dhjetë vendet që projekton, zhvillon dhe mirëmban anijen e saj luftarake, sipas medias vendase.
Ndërtimi i anijes luftarake “TCG Anadolu” filloi në prill të vitit 2016 dhe përfundoi këtë vit. Rreth 70 për qind e anijes luftarake është ndërtuar me kapacitete lokale.
Anija “TCG Anadolu” mund të transferojë njësi me madhësi batalioni në një vend të caktuar me mbështetjen e vet logjistike, pa pasur nevojë për mbështetje bazë nga jashtë. E ndërtuar në kantierin detar Sedef të Stambollit, kjo anije luftarake mund të transportojë helikopterë, drone, automjete tokësore, anije të lehta luftarake dhe personel.
Luftanija “TCG Anadolu” është 231 metra e gjatë dhe 32 metra e gjerë dhe mund të transportojë një ngarkesë prej rreth 27 mijë tonësh. /tesheshi.com/
