Sali Berisha, kjo figurë ikonike e post-komunizmit shqiptar, ende aktiv dhe protagonist, mbetet gjithsesi i patrajtueshëm në disa kënde të tjera. Ndaj tij, si dhe ndaj të tjera figurave të ngjashme me të në kuptim të rolit politik, si dhe ndaj vetë fenomeneve politike, media shqiptare vijon të jetë sipërfaqësore me pak përjashtime. Ata raportohen, deri në bezdi, por nuk analizohen. Edhe nëse analizohen, kjo për shkak të inflacionit analitik, asnjëherë shterrueshëm.
Fjala vjen, është Berisha një politikan i mençur? Ai është energjik, dinamik, ambicioz, i ashpër, por i mençur vështirë t’i thuash se është. Sali dhe mençuri nuk kanë asnjë pikëtakim mes tyre. Edhe formimi i tij shkollaresk, nga i cili doli një doktor nammirë, ka qenë vullnet më shumë se mençuri. Ose zgjuarsi e lindur, por prapë jo mençuri.
Nga zgjuarsia buron dhe djallëzia, ndërsa nga mençuria buron urtësia. Të tillë e kanë konotacionin gjuhësor këto dy fjalë.
Në fjalëmbajtjen e protestës të së enjtes, Berisha dhe njëherë shpërfaqi treguesin më të hatashëm të pamençurisë së tij, trashësinë ligjërimore. Si zakonisht, flet pa e ditur se ç’flet. Kësisoj, në 30 vjet nuk arrin dot të lërë në kujtesën kolektive asnjë thënie monumentale. Pasojë e kësaj është se është i tëri politik e aspak njerëzor. Çfarë do thotë kjo? Është një fenomen që e has pothuajse te të gjithë figurat e PD-së. Tej shfaqjes politike, ata janë asgjë. Berisha kryeson në këtë. Një figurë mundet mos ia qëllojë në politikë, por kjo nuk e privon atë të shpërfaqet i denjë te njerëzorja, më saktë kulturorja, edhe nëse këtë e bën duke qenë brenda politikës. Një shkëlqim të tillë, si protagonist publik, Berisha s’e ka patur kurrë.
Të dalim te fjalimi i tij në protestë. Pas 30 vitesh, ai përdor një tezë që vetëm në mendjen e tij infantile mund të ekzistojë: liria.
“Do i them Ramës këto fjalë: ne të dy sot jemi armiq, si ti Edi Rama ke për ideal pushtetin dhe vetëm pushtetin, kurse unë me këta burra e gra kemi për ideal lirinë”, ishin fjalët e Berishës.
Liria? Cili liri (pra jo Liri Berisha, e shoqja)? Ku është në diskutim liria sot? Liria në ç’kontekst? Kjo mund të qe frazë e denjë për mitingjet e ‘90-ës te Qyteti Studenti, por jo te “Dëshmorët e Kombit” në 2022 dhe me Ramën në pushtet. Rama i ka kapicë akuzat që mund t’i bëhen, por kjo me liri është një marrëzi e pashoqe. Së paku, nëse është fjala për privim të drejtash, nga të cilat burojnë dhe vrasjet, nuk ke për çfarë ta akuzosh. Berisha akuzohet së paku për dy vrasje në kushte qeverisëse: Remzi Hoxha dhe katër jetë të 21 janarit. Një e tillë nuk ekziston për Ramën.
“Liria” pra që përmend Berisha, për t’ja atribuuar Ramës si mungesë në qeverisjen e tij, është ndër pretendimet më të trasha.
Por kësaj, fjalimit i mungonte ajo që mund të quhej kujtesë e “të mirave” të ish-qeverisjeve të tij.
Berisha flet si një që vjen pa përvojë qeverisëse, pra që e tenton pushtetin për herë të parë. Por ai ka lënë pas një bilanc dhe këtë bilanc, nëse ka bindjen se ka qenë më i mirë se i Ramës, është i detyruar ta thotë.
Të pretendosh rikthimin në qeverisje pasi ke qeverisur në një total prej 13 vitesh, do të thotë që avantazhi yt janë bilancet e tua. Pse s’i thua? /tesheshi.com/
