Edi Paloka, nënkryetar i PD-së, është shprehur kundër idesë së krijimit të fraksioneve në parti.
Paloka tha se ka një dallim mes mendimit ndryshe dhe fraksioneve, të cilat i ka cilësuar si shkatërruese për PD-në. Gjithsesi në një intervistë për Neës 24, Paloka tha se kërkesat për fraksione, nëse do të ketë të tilla, do të shqyrtohen dhe vendosen nga forumet e Partisë Demokratike.
“Mendimi ndryshe dhe fraksioni janë dy gjëra të ndryshme. Në atë mbledhje nuk ka dalë ndonjë fraksion, por kanë diskutuar njerëz me mendime të ndryshme.
Këtë çështjen e fraksionit, që të jem i sinqertë e kam dëgjuar në media se nuk e kam parë ta shprehë apo kërkojë dikush. Është krejt normale që të ketë qëndrime të ndryshme. Jemi 27 vite demokraci dhe pluralizëm, normale që do ketë ide të tilla.
Kur këto qëndrime, ide, apo platforma, siç është përmendur, nëse vijnë në interes të qëllimit të përbashkët që kemi të gjithë demokratët, të ngritjes dhe fuqizimit të PD-së, janë të mirëpritura, dhe kjo është normale.
Kështu funksionon në demokraci. Këto ide paraqiten, diskutohen, votohen, dhe kështu ndodh në demokraci, pra vendos shumica. Pasi votohen dhe merret vendim nga strukturat e PD atëherë të gjithë janë të detyruar ta zbatojnë”, tha Paloka. /tesheshi.com/
