SHBA e kanë bërë të qartë dhe njëherë zhgënjimin e tyre me BE-në për mos’hapjen e negociatave me Tiranën e Shkupin.
Eshtë theksuar kjo në një akt simbolik e plot mesazh të të Dërguarit Special për Ballkanin Perëndimor, nga ZëvendësNdihmësi i Sekretarit të Shtetit Matthew Palmer, sapo “vuri këmbën” në Beograd.
Ai tha se vonimi i fillimit të bisedimeve të anëtarësimit në BE me Maqedoninë Veriore dhe Shqipërinë “ishte një gabim historik dhe një mesazh i keq për të gjithë rajonin”.
Pra, negociatat kanë qenë para Kosovës si çështje e trajtuar nga Palmer.
Palmer tha pas takimit me Vuçiç se SHBA. dëshiron që Ballkani Perëndimor të ketë një perspektivë evropiane dhe do të bëjë gjithçka për të bindur BE-në që të ndryshojë atë qëndrim përpara takimit të liderëve të Unionit në Zagreb majin e ardhshëm.
Ai tha se kishte mundësinë të diskutojë sot me Vuçiç situatën politike jo vetëm në Serbi, por në të gjithë rajonin, për të cilin ai tha se ishte veçanërisht e rëndësishme pasi BE nuk arriti të gjente një kompromis në hapjen e bisedimeve të anëtarësimit me Maqedoninë Veriore dhe Shqipërinë në BE.
“Sipas mendimit tonë, ishte një gabim historik dhe një mesazh i keq për të gjithë rajonin”, tha Palmer.
Nga ana tjetër e për temën tjetër, atë të Kosovës, Vuçiç pranoi me pezm faktin se SHBA e kanë njohur Kosovën, e se Serbia nuk mund të dilte kundër Amerikës
“SHBA e njohën Kosovën, Serbia ka një këndvështrim tjetër, por unë falënderoj Palmer që ishte i gatshëm të dëgjojë ato që kemi për të thënë sot dhe më herët”, tha Vuçiç, duke shtuar: “Ne nuk do të hyjmë në konflikte me Amerikën. As nuk më bie ndërmend të hyjmë në konflikt me fuqinë më të madhe”.
“Unë jam i kënaqur me bisedën me Palmerin sepse ne kemi shqyrtuar të gjitha çështjet në fjalë, të vendosura për të gjetur zgjidhje që do të lejonin marrëdhënie më të mira bilaterale midis Serbisë dhe SHBA dhe një qasje konstruktive dhe një përpjekje në marrëdhëniet me Prishtinën të kthehen në dialog”, tha Vuçiç. .
“Ne duam që dialogu të jetë serioz, i përgjegjshëm dhe të çojë në një zgjidhje kompromisi”, tha presidenti serb.
“Serbia është e gatshme për një kompromis, por nuk do të jetë e gatshme për poshtërimin e vet dhe nënshtrimin e popullit të saj në Kosovë”, theksoi Vuçiç. /tesheshi.com/
