Ajo mposhti Greqinë me një shikim dhe përqafoi rolin e saj si nga zbatueset e ligjit të Bashkimit Europian. Por, një vajzë sypërlotur, azilkërkuese nga Lindja e Mesme i hodhi sërish gurët në tavolinë, duke bërë që Angela Merkel të vihej në dyshim për dhembshurinë e saj dhe e fokusoi vëmendjen në dilemën humanitare të Europës.
“Nuk e kisha planifikuar fare të flisja me kancelaren për temën e refugjatëve”, thotë Reem Sahwil, 14-vjecarja palestineze, në një intervistë me New York Times në apartamentin e familjes së saj, në Rostok.
Reem është një nga qindra mijëra njerëzit që kanë mbërritur nga Lindja e Mesme, Afrika dhe vende të tjera në vitet e fundit në Europën Perëndimore për të kërkuar shpëtim apo një mundësi për të jetuar më mirë. Gjermania merr numrin më të lartë të kërkesave për azil në BE. Procedurat mund të zgjasin me vite dhe si tha edhe Merkel, shumë prej tyre janë refuzuar.
Aplikantë si familja e Reem që erdhi në Gjermani për arsye ekonomike, procedohen bashkë me ata që kërkojnë azil nga lufta apo persekutimi.
Reem e llogarit veten tek ata që ndjehen si në shtëpinë e tyre në Gjermani.
Ajo së bashku me dy motra më të vogla dhe prindërit jeton në një bllok apartamentesh në periferi, shtëpi që ia ka siguruar qeveria. Prindërit e saj nuk lejohet të punojnë derisa të përfundojë shqyrtimi i aplikimit për azil, dhe familja jeton me një ndihmë të vogël qeveritare.
Reem, e cila flet një gjermanishte fluente pas pesë vjetësh në Gjermani, thotë se dëshiron të jetojë dhe të studiojë përgjithmonë aty. Ajo dëshiron të bëhet përkthyese ose mësuese anglishteje që të mund të ndihmojë të tjerët të tejkalojnë problemet e komunikimit të cilat ajo i njeh mirë se i ka kaluar edhe vetë. “E kuptoj sesa e nevojshme është kur emigrantët mbërrijnë këtu”, thotë ajo.
Ajo ka lindur në një kamp refugjatësh në Baalbek në Liban në vitin 2000. Ajo lindi dy muaj parakohe dhe ka probleme shëndetësore, një tendinë të shkurtër dhe një paralizë në anën e majtë të trupit që ia vështirëson të ecurën.
I ati është përpjekur të paguajë për trajtimin e saj. Pas vitesh kujdesi shëndetësor të pamjaftueshëm, familja aplikoi për një vizë për trajtim në Gjermani në 2010 dhe shkoi në Dyseldorf për një operacion në shpinën e Reem. Familja e pagoi udhëtimin me paratë e falura nga shefi i të atit dhe donacionet e Kryqit të Kuq, familjarëve dhe fqinjëve.
Ky operacion është i pari nga ato që i duhen Reem dhe kjo nxiti familjen të aplikojë për azil. “Babai nuk mundet ta përballojë më”, thotë vajza për jetën e vështirë në Liban.
Reem shkon në një shkollë për studentë me aftësi të kufizuara.
“Kur jam në shkollë, ndjej se po dicka me jetën timë”, thotë ajo, duke shtuar se lëndët e preferuara janë anglishtja dhe gjermanishtja në të cilat është e vetmja nxënëse në klasë që ka dalë shkëlqyeshëm.
Reem u përzgjodh të merrte pjesë në forumin publik me kancelaren të mërkurën e javës së kaluar.
“Politika ndonjëherë është e vështirë”, tha Merkel, një koment që shumë opinionistë thanë se i mungonte dhembshuria. Të tjerë përgëzojnë sjelljen e Merkel, përfshirë edhe Reem.
“Ajo ishte e ndershme, dhe them se është mirë”, thotë Reem./tesheshi/
