Një fermer palestinez është vrarë në Gaza nga izraelitët vetëm disa orë para nisjes së protestës së quajtur “Marshi i madh i Kthimit” që është planifikuar të zgjasë gjashtë javë.
Sipas ushtrisë izraelite një tank ka hapur zjarr ndaj dy personave pasi ka vënë re veprime të dyshimta nga ata pranë një gardhi sigurie që shërben si kufi. Ndërsa dëshmitarët thanë për BBC-në se fermerët u goditën nga tanku ndërkohë që ishin duke mbledhur majdanoz në fushë.
Palestinezët kanë ngritur tenda në kufi për protestën që kërkon që refugjatët palestinezë të lejohen të kthehen.
Hamasi, grupi militant që dominon Rripin e Gazës, ka akuzuar Izraelin se vrasja e fermerit është bërë për të trembur palestinezët dhe për t’i lënë të kuptojnë se nuk duhet të marrin pjesë në protestë. Ministria e Jashtme e Izraelit e ka cilësuar protestën “përpjekje e hapur për një konfrontim” dhe ka shtuar se “përgjegjësia për çdo përplasje të mundshme i përket vetëm Hamasit dhe pjesëmarrësve në protestë”. /tesheshi.com/
