Palestinezët i kërkojnë OKB-së mbrojtje ndërkombëtare

Rijad Mansur, kryediplomati palestinez në OKB, kërkoi një ditë më parë nga Këshilli i Sigurimit që të marrë në konsideratë mbrojtjen ndërkombëtare për palestinezët nën pushtimin izraelit.

Përfaqësuesi palestinez theksoi në një sesion të jashtëzakonshëm të Këshillit të Sigurimit se ky i fundit duhet të mbajë përgjegjësinë e tij për ruajtjen e paqes dhe sigurisë ndërkombëtare, e se, “duhet të ndërhyjë menjëherë për t’i dhënë fund këtij agresioni.”

Ai kërkoi që Këshilli i Sigurimit të adopotojë një rezolutë të ngjashme me atë të vitit 1998, “Rezoluta 904”, të formuluar asokohe pasi një kolon hebre vrau 29 besimtarë muslimanë në Hebron. Ajo rezolutë  kërkonte nga Izraeli që “të garantonte sigurinë dhe mbrojtjen e civilëve palestinezë në të gjithë territorin e pushtuar,” duke përfshirë një “prani të përkohshme ndërkombëtare.”

I menjëhershëm ka qenë reagimi i David Roet-it, zëvendësit të të dërguarit të Izraelit në OKB, i cili deklaroi se vendi i tij nuk do të pranojë asnjë forcë mbrojtjeje ndërkombëtare rreth kompleksit të xhamisë el-Aksa.

“Më lejoni të jem i qartë si kristali. Izraeli nuk do të bjerë dakort për asnjë prani ndërkombëtare në Malin e Tempullit,” u shpreh ai, duke përdorur termin hebre për el-Aksanë.

Përndryshe, ambasadorja e Jordanisë në OKB, Dina Kavar, vendi i së cilës është kujdestar i kompleksit el-Aksa, qartësoi se Jordania nuk po bënte presion për një forcë të re ndërkombëtare, por forcat izraelite të sigurisë duhet të qëndrojnë larg el-Aksasë.

Gjatë dy javëve të fundit kanë gjetur vdekjen më shumë se 30 palestinezë, në një përshkallëzim të dhunës izraelite. /tesheshi.com/