Ministri i Jashtëm Ditmir Bushati ka dërguar në Presidencë shkresën e kërkuar nga Ilir Meta për negocimin e Detit me Greqinë.
Ministria e Jashtme nuk ka bërë publike tekstin, por nga Presidenca bënë të ditur se materiali erdhi dje pasdite.
Tani pritet që sa më shpejt kreu i shtetit të japë gjykimin e tij nëse është e plotë apo jo shkresa e Ministrisë për Europën dhe Punët e Jashtme.
Presidenti Ilir Meta ka kërkuar informacion shtesë dhe transparencë për negociatat me Athinën, duke bërë të ditur se deri tani nuk është informuar fare Presidenca.
Qeveria shqiptare dhe ajo greke kanë bërë të ditur se kanë rënë dakord parimisht për kufirin dhe në prill kryeministri grek Alexis Tsipras do të vijë në Tiranë për të firmosur Partneritetin Strategjik.
Por ende nuk dihet jo vetëm nga publiku, por as nga Presidenti i Republikës se çfarë është biseduar.
Kreu i shtetit shqiptar nuk e dha plotfuqishmërinë e kërkuar nga Bushati për negociatat me Athinën.
Meta tha se Presidenti nuk mund të firmosë mbi një fletë të bardhë.
Presidenti i Republikës deklaroi se ai nuk do të lejonte të shkelej Kushtetuta e vendit dhe bëri publike të gjithë kërkesën e tij dërguar Bushatit.
Në kërkesë Meta hedh dyshime të mëdha për negocimin paraprak ndërmjet ministrave të jashtëm dhe kryeministrave të dy vendeve.
Meta, në shpresën e publikuar kërkoi sqarime për objektin dhe backraund-in e negociatorëve. Madje ka shtuar edhe një kërkesë që në ekipin negociator të marrin pjesë edhe anëtarë nga institucione të pavarura që kontrollohen nga Presidenca. /tesheshi.com/
