Tre pakot me pjesë armësh luftarake që u zbuluan në aeroportin “Nënë Tereza” në Tiranë kishin si destinacion Londrën në Britaninë e Madhe.
Pakot do të kalonin transit përmes Greqisë. Policia ka nisur hetimet për të zbuluar dërguesin, i cili zgjodhi shërbimin DHL për të bërë transportin, por deri tani ka rezultuar se emri i dhënë ishte i rremë.
Ndërkohë hetimet janë nisur edhe nga policia greke dhe ajo angleze, ku gjithashtu rezulton se pritësi me emrin e dhënë nuk ekziston. Kjo e vesh edhe me më shumë mister ngjarjen, për të cilën ka vetëm një njoftim të shkurtër zyrtar mbi gjetjen e 3 pakove gjatë skanimit.
Prej disa ditësh policia, në bashkëpunim me agjensitë ligjzbatuese, kanë shtuar kontrollet në pikat e kalimit kufitar, përfshi këtu edhe Rinasin, apo në zona të populluara, në kuadër të një plani për të parandaluar çdo ngjarje me karakter terrorist. /tesheshi.com/
