Gjykata e Krimeve të Rëndë ka vendosur masën e arrestit me burg për shtetasin Sajmir Cullhaj, i cili është arrestuar nga policia si personi që bëri dërgesën e tre kallashnikovëve drejt Anglisë, por që u zbuluan në Rinas.
Edhe pse para gjykatës, ai është justifikuar se nuk dinte se çfarë kishte brenda, pasi ia kishte dhënë në mik për t’i dërguar në Angli, kjo nuk e shpëtoi nga burgu.
“Përmes mikut tim me emrin Tani, që më tha se do çonte pako në Britani, shkova tek DHL për t´i dorëzua,r por nuk e dija se çfarë kishte. Unë shkova me makinën e tij te DHL për të dorëzuar pakot, por kur më arrestoi policia, aty mora vesh që kishte armë,” mësohet të ketë thënë Cullhaj.
Tre ditë më parë, policia kufitare në Rinas, gjatë një kontrolli rutinë, mundi të zbulojë pakot me armë, ndërsa më pas prangosi Cullhajn si dhe shpalli në kërkim një person tjetër.
Burimet bënë të ditur se pakot ishin mbështjellë mes të tjerave edhe me qese, një material që mban gjurmët, prej nga u zbulua edhe i arrestuari. /tesheshi.com/
