Policia e Shtetit, në bashkëpunim me autoritetet ligjzbatuese në Britaninë e Madhe, ka arritur të identifikojë personin përgjegjës për 3 pakot me pjesë armësh luftarake që u bllokuan një ditë më parë në aeroportin “Nënë Tereza” në Tiranë.
Dërgesa kishte si destinacion Londrën, ndërsa ajo do të kalonte transit nga Greqia. Pakot u zbuluan pas skanimit nga kompania e sigurimit të aeroportit, ndërsa nga verifikimet rezultoi se personi që i nisi kishte përdorur identitet të rremë, sikundër edhe pritësi.
Por, pas një hetimi 24-orësh, ku u përfshinë edhe agjentë të SHISH dhe antiterrorist, në bashkëpunim edhe me agjensitë ligjzbatuese në Britaninë e Madhe, duket se është identifikuar personi përgjegjës, emri të cilit nuk bëhet publik, për arsye hetimi. /tesheshi.com/
