Ndalimi i shamisë për forcat policore të Turqisë është hequr, pas ndryshimeve të bëra në Kodin për veshje, në kuadër të fushëveprimit të pakos së demokratizimit të kaluar nga Partia për Drejtësi dhe Zhvillim, në vitin 2013. Duke filluar nga 27 gushti, gratë që shërbejnë në Policinë Kombëtare Turke do të kenë mundësi të bartin shaminë, njoftoi të premten gazeta Zyrtare.
Rregullorja parasheh që shamia duhet të përputhet me ngjyrën e uniformës dhe duhet të jetë e thjeshtë.
Një numër në rritje i vendeve perëndimore po lejojnë gratë muslimane të veshin shaminë islame, ose hixhabin, përfshirë së fundmi edhe Skocia, SHBA-të, Australia dhe Kanadaja.
Partia qeveritare AK nën udhëheqjen e Erdoganit u bë pionier në drejtim të zgjidhjes së çështjes së mbulesës në vend, që kishte vendosur me miliona gra në dilemën që të zgjedhin në mes të fesë dhe edukimit ose profesionit.
Përmes pakos së demokratizimit, me qëllim të garantimit të të drejtave demokratike për të gjithë qytetarët, qeveria ka miratuar ligje dhe ka bërë ndryshime në ato ekzistuese, që u siguron femrave me shami arsimim, si dhe punësim në sektorin e shërbimeve publike.
Pako e demokratizimit po ashtu ka adresuar një numër të të drejtave dhe lirive të tjera për pakicat etnike dhe fetare të Turqisë, personat me aftësi të kufizuara dhe të tjerë. /tesheshi.com./
