Autoritetet pakistaneze i janë kthyer ashpër Presidentit Trump, pas mesazheve të këtij të fundit dy ditë më parë ku thoshte se ky vend po strehon terroristë, edhe pas 33 miliardë dollarësh të marra nga SHBA në 15 vjet, pikërisht për të luftuar terrorizmin.
Ministri i Jashtëm i Pakistanit, Khawaja Muhammed Asif, tha në reagimin e tij se “historia na ka mësuar se nuk duhet t’i besojmë verbërisht SHBA-ve”. E më pas, kreu i diplomacisë së Islamabadit, ka vijuar duke thënë: “Presidenti i SHBA-ve na pyet ‘Çfarë bëtë ju?’ Ne i hapëm bazat ushtarake për ju. Furnizimi me armë dhe municione i ushtarëve të SHBA-ve në Afganistan u bë mbi tokat tona. Mijëra civilë dhe ushtarë tanë u bënë viktima të luftës që e filluat ju”, ka thënë Asif. /tesheshi.com/
