Nga Blendi Gashi
Kosova këtë vit synon të bëhet anëtare e Organizatës ndërkombëtare të policisë penale (Interpol) dhe Zyrës evropiane të policisë (Europol). Kështu ka deklaruar së fundmi kryeministri Hashim Thaçi në Kuvendin e Punës së Lidhjes Demokratike të Kosovës, ku ka folur edhe për sfidat që po dalin në procesin e integrimit, duke përfshirë edhe anëtarësimin në Interpol.
“Kosova po ballafaqohet me kufizime të caktuara në proceset e integrimit që janë pasojë e mos njohjes të disa vendeve të Bashkimit Evropian. Duhet të vazhdojmë të thellojmë bashkëpunimin edhe më shumë përmes marrëdhënieve të mira me fqinjët dhe trajtimit shumë të mirë që po u bëjmë komuniteteve jo shumicë, të argumentojmë nevojën që të na njohin. Synimet tona janë që në këtë vit të bëhemi anëtare e Interpolit, vitin e ardhshëm të anëtarësohemi në UNESCO”, deklaroi të shtunën Mustafa.
Njohës të sundimit të ligjit dhe sigurisë thonë se duhet edhe shumë kohë dhe lobim i fortë që Kosova të jetë anëtare e Interpolit dhe Eurpolit, pasi Serbia nuk po lë gurë pa lëvizur që të pengojë anëtarësimin e shtetit tonë në organizata ndërkombëtare.
Që Kosova të jetë anëtare e Interpol-it dhe Eurpol-it, duhet të ndërtoj lobim të fuqishëm me Shtetet e Bashkuara të Amerikës dhe vendeve evropiane, si dhe të arrijë një marrëveshje me UNIMK-un, që memorandumi mes Interpolit dhe UNMIK-ut, të dal si i pavlefshëm.
Duhet lobim i fortë diplomatik për anëtarësim në Interpol
Donika Emini, hulumtuese në Qendrën kosovare për studime të sigurisë thotë se anëtarësimi në Interpol dhe Europol dhe organizata të ngjashme multilaterale të bashkëpunimit në fushën e sigurisë është shumë i rëndësishëm për Kosovën.
Sipas Eminit, anëtarësimi në këto organizata përveç se do të kontribuonte në bashkëpunimin e Kosovës në fushën e sigurisë, që është për nga natyra shumë senzitive, do të fuqizonte edhe përpjekjet për luftën kundër kërcënimeve globale siç janë ekstremizmi i dhunshëm, krimi i organizuar, sigurimin e kufijve, etj.
“Aplikimi për anëtarësim në mekanizma multilateral në fushën e sigurisë është një proces relativisht i lehtë megjithatë, sigurimi i sponsorit kryesor që do të lobonte për anëtarësimin e Kosovës dhe votave të mjaftueshme për tu bërë anëtare, është një proces që kërkon pikë së pari mobilizim dhe koordinim në mes të institucioneve relevante në Kosovës (Ministrisë së Punëve të Jashtme, Ministrisë së Punëve të Brendshme, Policisë së Kosovës) e më pastaj lobim të fortë diplomatik dhe përgatitje, punë sistematike dhe agjendë të përbashkët dhe të qartë. Këtij procesi duhet t’i paraprijë MPJ, ndërsa MPB duhet të shërbejë si instrument mbështetës”, thotë Emini, për tesheshi.com.
Ajo thotë se dështimi i anëtarësimit në UNESCO ka vënë diplomacinë kosovare në një pozicion defansiv dhe kjo sipas saj e rrit skepticizmin për suksesin e Kosovës në këtë vit.
“Këtë vit, nga 13 anëtarë të Komitetit Ekzekutiv, së paku nga prejardhja e përfaqësuesve, aktualisht 6 vijnë nga vendet të cilat nuk e kanë njohur Kosovën, kjo edhe më tej e vështirëson punën e shtetit tonë. Për më tepër, diplomacia e Serbisë e cila është shumë e fortë në drejtim të vështirësimit të anëtarësimit të Kosovës në organizata ndërkombëtare, edhe Interpol, nuk do të kontribuojë agjendës së Kosovës. Megjithatë, është momenti i duhur që të intensifikohen përpjekjet për anëtarësim në Interpol, kjo duke patur parasysh që anëtarësimi i Kosovës do të sjellë përfitime të ndërsjella, pra për Kosovën dhe shtetet e mëdha perëndimore, sidomos kur bëhet fjalë për bashkëpunim dhe shkëmbim informatash në lidhje me ekstremizmin e dhunshëm dhe kërcënimeve potenciale nga qytetarët e Kosovës që janë bashkangjitur konflikteve në Siri dhe Irak”, thekson Emini, për tesheshi.com.
Sa i përket, anëtarësimit në Europol, hulumtuesja Emini shprehet se ky proces ende mbetet një sfidë e madhe për qeverinë e Kosovës, për shkak të mos njohjes nga pesë shtetet anëtare të Bashkimit Evropian.
S’ka lobim të fuqishëm nga ana e qeverisë
Njohësi i çështjeve të sigurisë, Burim Ramadani, thotë se Kosova i ka të gjitha argumentet profesionale, juridike dhe politike për t’u anëtarësuar në Interpol, derisa thotë se për anëtarësimin në Europol problemet janë më të mëdha.
“Kosova duhet të ndërtojë lobim të fuqishëm nga partnerët ndërkombëtar dhe të arrijë njëlloj ‘marrëveshje xhentëlmenësh’ me UNMIK-un për të shpallur jovalid Memorandumin që ekziston midis UNMIK-ut dhe Interpol-it. Deri më tash, nuk e kemi parë asnjërën. Pra, as lobim e fuqishëm ndërkombëtar dhe as tërheqjen e memorandumit të UNMIK-ut me Interpol-in”, thotë eksperti Ramadani, për tesheshi.com.
Ministri Hyseni optimist, por s’jep parashikime
Portali gjatë tërë ditës është munduar të marrë një përgjigje edhe nga Ministria e Brendshme për këtë çështje, por ka qenë i pamundur kontakti me drejtues të kësaj ministrie.
Ministri i Punëve të Brendshme, Skender Hyseni, kohë më parë në një deklarim për media është shpreh optimist se Kosova së shpejti do të jetë anëtare e Interpol-it.
“Nuk mund të jap parashikime të sakta, por ju siguroj që përpjekjet nuk mungojnë e do të jenë të gjithanshme që ky të jetë një sukses. Në Ruanda do të mbahet Asambleja e përgjithshme diku nga fundi i vjeshtës”, ka thënë ministri Hyseni.
Ai ka theksuar se janë duke punuar edhe në përgatitjen e një bashkëpunimi strategjik me Europol-in, deri sa Kosova të ketë anëtarësim të plotë në këtë organizatë.
Ndryshe, Kosova komunikimin me Interpolin e ka përmes zyrës së UNMIK-ut, as me Eurpolin nuk ka komunikim të drejtpërdrejtë, vetëm përmes zyrës së EULEX-it në Kosovë, e cila shërben si ndërmjetësues mes Kosovës dhe Eurpolit.
Për t’u anëtarësuar Kosova duhet të siguron 2/3 e votave e mbi 190 anëtarëve të Asamblesë së Përgjithshme të Interpol-it në mënyrë që të anëtarësohet në këtë organizatë. /tesheshi.com/
