Kapiteni i përfaqësueses së Turqisë, e njëkohësisht lojtari i Barcelonës, ka kërkuar solidaritet global pas sulmeve terroriste pranë stadiumit të Beshiktashit në Stamboll që u morën jetën dhjetëra njerëzve.
“Kërkoj që të gjithë ne të bëjmë një lutje për solidaritet të përgjithshëm,” u tha Arda Turan të pranishmëve në një aktivitet në Madrid të Dhomës Spanjollo-Turke të Tregtisë dhe Industrisë, ndërsa po i jepej një çmim.
“Të gjithë ne këtu kemi përparësi të ndryshme në jetë, por njerëzimi ka nevojë për mbështetjen tonë, e ne duhet të bëjmë ç’të mundemi për të arritur paqen në botën ku jetojmë,” tha lojtari turk që mban të veshur bluzën e Barçës që prej vitit të kaluar.
“Dua t’i kujtoj të gjithë të vrarët në sulme dhe t’i dërgoj përshëndetje vendit tim, popullit tim.”
Sa i talentuar në fushë, po aq dhe jashtë saj, Arda Turan ka falënderuar dhe spanjollët për solidaritetin e treguar pas akteve terroriste në metropolin turk.
“Turqia po kalon kohë të vështira, por ne i jemi mirënjohës popullit spanjoll për mbështetjen dhe solidaritetin.” /tesheshi.com/
