Pasi e çuan në ekstrem raportin e cunguar mes tyre, dy krerët e Kosovës, Presidenti Thaçi e kryeministri Kurti u takuan mes tyre, duke përcjellë më pas mesazhe paqtuese.
“Ky takim që ka qenë i nevojshëm për të mirën e vendit të qytetarëve për të sotmen dhe të ardhmen. Pas takimeve që kam zhvilluar me liderët e partive politike, takimi me Kryeministrin Kurti ka qenë në vazhdën e konsultave për hapat e mëtutjeshëm që duhet të ndërmerren nga institicuionet e Republikës së Kosovës”, tha Thaçi.
“Konstatoj se takimi ka qenë i gjatë, ka qenë përmbajtjesor, shumë i hapur, ku janë diskutuar gjëra të cilat kemi pasur këndvështrime konstruktive. Është diskutuar për çështjet e brendshme dhe politikës së jashtme, për interesat nacionale, prioritet e shtetit të Kosovës , për reformat që duhet të ndodhin në vend që të lëvizim drejt perspektivës evropiane, për rolin dhe fuqizimin e Kosovës në arenën ndërkombëtare, gjithashtu edhe për dialogun Kosovë-Serbi”, shtoi më tej kreu i shtetit.
“Më tepër gjëra në përafrojnë sesa na ndajnë”, ishte ajo çfarë Thaçi përcaktoi frymën e bisedës me të parin e qeverisë, ku njëherësh deklaroi unitetin përballë serbëve në tavolinën e dialogut.
“Në tavolinë do të jemi të bashkuar si Kosovë – për ruajtjen e interesit shtetëror dhe perspektivën euroatlantike. Interesi nacional është mbi të gjitha”,theksoi Thaçi, ndërsa për çështjen më te ndjeshme, atë të taksës, tha se “është në autoritetin e qeverisë dhe të marrë vendimin në interesin nacional”.
Të njëjtën klimë paqtimi përcolli dhe kryeministri Kurti, kur tha se “ishte takim që u dakorduam që të takohemi që të komunikojmë dhe bashkëpunojmë, sidomos për politikë të jashtme”.
“Ka mundësi që për disa gjëra jemi pajtuar edhe më herët, konstatimi për to ngjan si një lloj përfarimi, këtu po kufizohem duke përmendur Mini-Shengenin. Nuk është se nuk pajtohemi për asgjë”, shtoi i pari i qeverisë së Kosovës.
Takimi mes tyre erdhi pas një klime tensioni, pasi Kurti refuzoi të takohej me Thaçin pas një ftese të këtij të fundit dërguar të gjitha forcave politike, gjë që e çoi të shprehej ashpër ndaj kreut të VV-së, tashmë kryeministër.
Po kështu dhe Kurti, i cili shpalli se Kosova ka nevojë për tjetër president. Të dyja këto qëndrime prej tyre, vetëm tre ditë më parë. /tesheshi.com/
