Me kërkesë të Prokurorisë së Tiranës, gjykata ka vendosur për “pezullim nga detyra” për Drejtorin e Përgjithshëm të Policisë, Haki Çako, i cili akuzohet për “Shpërdorim detyre” në vijim të hetimit për dyshimet mbi ekzistencën e një pajisje përgjimi, e administruar në kundërshtim me ligjin nga ana e Policisë së Shtetit.
Po me kërkesë të Prokurorisë së Tiranës, gjykata ka vendosur masën e sigurimit “Arrest në shtëpi” me mbikqyrje elektronike për Artion Duka, me funksion Drejtor i Forcave Operacionale (F.O) dhe Entiol Xhelilaj, specialist pranë F.O, të dy të dyshuar për veprat penale të “Shpërdorimit të detyrës” dhe “Veprimeve që pengojnë zbulimin e të vërtetës”.
Prokuroria e Tiranës dyshon se këta persona kanë lejuar aktivitet të kundërligjshëm përgjimi.
Sipas Prokurorisë, në cilësinë e Drejtorit të Përgjithshëm të Policisë, Haki Çako nuk ka marrë asnjë masë për të rregulluar hyrjen e pajisjes në territorin e Shqipërisë dhe, për më tepër, rezulton që ai nuk ka asnjë dijeni për regjimin doganor që aplikohet në këto raste.
Gjithë qëndrimin zyrtar të Prokurorisë në lidhje me pezullimin nga detyra të Drejtorit të Përgjithshëm të Policisë, Haki Çako si dhe “arrestin shtëpiak” të dy funksionarëve të tjerë, lidhur me pajisjen e përgjimit, klikoni ketu. /tesheshi.com/
