Nga Blendi Gashi
Vendimi i marrë nga kryeministri Haradinaj për rritjen e pagave, ku i dyfishon rrogën vetes dhe pesë zv. kryeministrave, dhe ku në këtë rritje përfshihen edhe ministrat, zv.ministrat, këshilltarët etj., e ku më e larta do jetë 2950 euro (paga e Ramushit) kurse më e vogla 800 euro, ka bërë që të plasin reagime të fuqishme si nga opozita, organizatat e shoqërisë civile por edhe qytetarët.
Ky vendim po quhet skandaloz duke pasur parasysh papunësinë e varfërinë e madhe në vend, çka e ka shtyrë edhe deputeten e Vetëvendosje-s, Albulena Haxhiu, që këtë vendim ta dërgojë në Agjensionin Kunder Korrupsionit, pasi thotë se “Neni 424 i Kodit Penal i ndalon personit zyrtar të vendos për një çështje që ka interes të drejpërdrejt financiar!”.
Ajo më pas ka paralajmëruar se këtë vendim do ta dërgojë edhe në Gjykatën Kushtetuese sepse është në shpërputhje me gjendjen socio-ekonomike.
Megjithatë, para se të merrte këtë vendim, Haradinaj ka folur vetëm për pagat e këshilltarëve të tij ku deklaroi se marrin 560 euro dhe është shumë tejet e vogël për punën që bëjnë.
Haradinaj rriti beneficionet edhe më 2005…
Se rritja e pagave për kabinetin qeveritar dhe zyrtarët tjerë nuk është diç e re nga Haradinaj, e tregon edhe vendimi i marrë 1 mars të vitit 2005, vendim i cili u njeh ministrave të drejtën e pagës për një vit pas mbarimit të mandatit të tyre.
Ky vendim u votua edhe nga LDK pasi Ramushi mbante pozitën e kryeministrit në koalicion me partinë që udhëhiqte Ibrahim Rugovën, kohë kur ishte koha e institucioneve të përkohshme vetqeverisëse, pra kur punohej me rregullore të UNMIK-ut.
Ky vendim më pas u përkrah edhe nga pasardhësit e Haradinajt, pra kryeministrat e tjerë pasi bëhet fjalë për benificione për ministrat.
Me vendimin e ri kryeministri Haradinaj jo vetëm që do ketë pagën më të lartë se presidenti Thaçi e kryekuvendari Veseli, por do paguhet më së shumti se nga homologët e tij nga Shqipëria, Maqedonia, Mali i Zi dhe Serbia.
Në vendimin e qeverisë të mbledhjes së mbajtur më 1 mars 2005 thuhet:
– Ministrave të qeverisë së Kosovës u njihet e drejta e pages për një vit pas mbarimit të mandatit të tyre
– Paga e ish-ministrave do të jetë në vlerë të 70% të pages së plotë që kanë marrë gjatë mandatit të tyre
– Të drejtë në këtë page kanë ish-ministrat të cilat nuk marrin të ardhura nga buxheti i konsoliduar i Kosovës
– Pagesa bëhet nga Ministria të cilën e kanë udhëhequr nga dita që hyn në fuqi
– Vendimi hyn në fuqi ditën e nënshkrimit
– Vendimi ju dërgohet të gjithë ministrave (ministrive), sekretarit të përhershëm të Zyrës së Kryeministrit dhe arkivit të qeverisë. /tesheshi.com/
