Gjykata e Krimeve të Rënda ka zbardhur vendimin e saj mbi ish-ministrin Tahiri, ku sqaron se ai, Saimiri në përgjimet e Habilajve, nuk vërtetohet nga hetimet që të ketë qenë pikërisht Saimir Tahiri, ministër Rendi.
Në fakt, në përgjime në asnjë rast emri Saimir nuk shoqërohet dhe me mbiemrin Tahiri, ndërkohë që sipas gjykatës, hetimet nuk kanë provuar asnjë akuzë referuar përgjimeve.
“Sa u përket dhuratave dhe shumave të parave që pretendohet që Moisi Habilaj i ka dhënë Tahirit dhe bashkëshortes së tij, gjykata argumenton se nuk ‘kanë rezultuar prova që të konfirmojnë përgjimet ambientale të kryera nga autoritetet gjyqësore italiane ku të pandehurit në procesim të lidhur ‘Moisi Habilaj, Nezar Seiti, Eneo Sulaj dhe personat e tjerë, në kohën që ndodhen në automjete fjaslin për dhënie dhuratash (byzylykë dhe kostumi “Hugo Boss’) dhe shuma e parave të pandehurit Saimir Tahiri, bashkëshortes dhe nënës së tij. Dhuratat e referuara në përgjime në të vërtetë nuk janë konfirmuar nga dëshmia e pronarëve të dyqaneve dhe bizhuterive dhe rrobave në Itali, nuk kanë rezultuar nga kontrolli i dokumentacionit të tyre, dhe as nuk janë gjetur nga kontrolli i banesës së të pandehurit Saimir tahiri në Shqipëri, përfshi edhe gjurmë të tjerë të çfarëdolloj që të tregojnë ekzistencën e tyre (siç mund të jenë dokumente shit-blerje, fatura, garanci etj). Gjatë hetimi nuk është gjetur dhe sekuestruar asnjë shumë parash të pëndehurit aspo personave të afërm të tij që të jenë shumat e referuara në përgjime, ose të paktën që të jenë shuma të pajustifikuara nga i pandehuri apo të afërmit e tij”, thuhet në sqarimin e gjykatës.
Edhe sa i përket një bashkëpunimi mes kushërinjsh për trafik droge, gjykata thotë se në “vlerësimin e kësaj gjykate nuk vërtetohet përtej çdo dyshimi të arsyeshëm bashkëpunimi dhe qenia e të pandehurit Saimir Tahiri pjesëmarrës dhe anëtar i këtij grupi kriminal sipas kuptimit të neneve 25 3 26 paragrafi i pestë në lidhje me nenet 28 pika 4 dhe 33/a të Kodit penal”.
Ndërkohë, ish-ministri Tahiri u dënua vetëm me 3.4 vite burg për shpërdorim detyre, që më pas e konvertuan me tre vite shërbim prove. E kjo si përgjegjësi zyrtare.
“Megjithatë, fusha e veprimtarisë shtetërore të të pandehurit Saimir Tahiri, në detyrën e Ministrit të Brendshëm lidhej pikërisht mes të tjerave me parandalimin dhe luftimin e kriminalitetit veçanërisht të veprimtarisë së paligjshme të trafikimit të narkotikëve dhe të gjitha veprimtarive të tjera të paligjshme që lidhen me të, referuar legjislacionit përkatës”, argumenton gjykata. /tesheshi.com/
