Në qytetin e Padovas, Itali, ndodhet Kopshti Botanik Universitar më i vjetër në botë. Ky kopsht, që ka qenë përherë një qendër kërkimesh shkencore, shkëmbimesh kulturore dhe didaktike, është futur në listën e pasurive botërore të UNESCO-s në vitin 1997.
I themeluar në vitin 1545, Kopshti Botanik i Padovas ka shërbyer në fillim si një kopsht mjekësor, ku kultivoheshin bimë mjekësore për qëllime shkencore dhe didaktike. Shumë shpejt, ky kopsht u shndërrua në një vend që zgjoi interes të madh, për shkak të bimëve të rralla që gjendeshin në të. Pikërisht për t’i mbrojtur këto bimë të çmuara, disa vjet pas themelimit të këtij kopshti, u pa e nevojshme ngritja e një muri rrethues.
Palma e Gëtes, e mbjellë në fund të viteve ‘500 – Sot, Kopshti Botanik i Padovas numëron rreth 3500 lloje bimësh si dhe shumë pemë të lashta, ndër të cilat dallon më së shumti palma e San Pietros që i përket vitit 1585. Kjo palmë është pema më e vjetër e këtij kopshti dhe njihet botërisht si “Palma e Gëtes”, qëkurse poeti i madh gjerman, i frymëzuar prej saj, pati shkruar materialin me titull “Metamorfoza e bimëve” (1790).
Kopshti i biodiversitetit – Në vitin 2014, Kopshti Botanik i Padovas u zgjerua më tej, duke krijuar edhe një hapësirë tjetër të quajtur “Kopshti i biodiversitetit”. Ky kopsht përbëhet nga pesë sera të mëdha e të reja ku secila prej tyre përfaqëson një biomë të veçantë. Me një ndërthurje ndërmjet botanikës dhe antropologjisë, kopshti i biodiversitetit pasqyron marrëdhëniet e njeriut me natyrën përgjatë shekujve, duke u dhënë mundësi vizitorëve që të njihen me bimë të kohëve e të zonave të ndryshme.
