Presidenti i AKR-së, Behgjet Pacolli vazhdon të këmbëngulë në bërjen e një qeverie gjithëpërfshirëse, ndërsa fton liderët politikë të lën anash interesat individuale.
Ai thotë se deputetët e partisë së tij nuk janë vetëm numra, por sipas tij zgjidhje e ngërçit politik që është futur Kuvendi, ndërsa shton se AKR-ja do zgjidhje urgjente të kësaj situate, dhe është e paluhatshme në vendimet e saj.
“AKR kërkon urgjent të krijohet një konsensus midis partive të opozitës, për krijimin e qeverisë së re dhe sa më shpejt të dilet me një platformë alternative qeverisëse për qytetarin e Kosovës. Nuk mund të vijohet në paqartësi. Përndryshe altarnativa e fundit mbetët propozimi im për qeveri gjithëpërfshirëse për të cilen unë po insistoj prej dy muajsh. Jo vetëm që po më duket por është e vetmja zgjidhje. Duhet të lihen mënjanë interesat grupore, individuale, partiake e të punohët në favor të Kosovës”, ka shkruar Pacolli në Facebook.
Pacolli paralajmëron LDK dhe VV nëse nuk gjejnë një zgjidhje alternative, partia e tij do të jetë në anën e qytetarit, pa treguar nëse i bashkohet PAN-it.
“Këtu po shihet se AKR edhe pse me pak deputet, duhet të veproj në zgjidhje e ngërqit dhe për këtë, edhe njëhere apeloj tek LDK dhe VV që të gjejnë zgjidhje, definojnë dhe të krijojnë qeverisjën alternative. AKR-në e kanë paluhatshëm në dispozicion, por në mungesë të kësaj zgjidhje, katër deputetët e AKR nuk do të konsiderohen më vetëm si numra duke pritur dhe kontribuar ngërqit, për interesat e tyre. Unë dhe AKR duam zgjidhje urgjente, ngase jemi në anën e qytetarit dhe Kosovës”, ka shkruar Pacolli.
Ndërkaq seancën e sotme e ka quajtur një shprazje e urrejtjes, mllefit mes liderëve partiakë, duke u tallur me popullin, për çka vë në pikëpyetje pjesëmarrjen e tij në seanca të tilla.
“Sot secili prej liderëve po tenton me qenë në majat e shtetit, si kryeparlamentar, kryeministër, ministër, me kapë pushtetin. Nuk u kursyen as me treguar se çdo të bëjnë në momentin kur të marrin pushtetin. Foltorja e institucionit u përdor si tribunë elektorale”, thotë Pacolli. /tesheshi.com/
