Kreu i diplomacisë kosovare, Behgjet Pacolli ka vënë alarmin mbi një revansh të Beogradit në politikën e jashtme në dëm të Kosovës. Duke evidentuar faktin se Serbia po bën përpara në cështjet e integrimit, Pacolli u ndal tek një fushatë e saj lobuese kundër njohjeve të reja të Kosovës, apo deri dhe në tërheqje të njohjeve të deritanishme.
“Aq larg ka shkuar sa po bën lobim të madh edhe tek shtetet që e kanë njohur Kosovën në mënyrë që të tërheqin njohjen”, tha Pacolli. Ai ofroi dhe një fakt, ku sipas tij Serbia ka ndarë rreth 300 milionë buxhet dhe kanë angazhuar një grup prej 20 personash, ekspertë të politikës së jashtme që të vizitojnë shtete të ndryshme në botë dhe të lobojnë kundër Kosovës.
Terreni ku më shumë po vepron Serbia kundër njohjeve, sipas sqarimeve të Pacollit, është Afrika.
Komentet e ministrit të Jashtëm në qeverinë Haradinaj, u bënë gjatë një raportimi të tij në komisionin e jashtëm parlamentar. /tesheshi.com/
