Pas shkrimeve të vazhdueshme të mediave se Aleanca Kosova e Re, do t’i bashkohet PAN-it ka reaguar Behgjet Pacolli, i cili ka mohuar se është lëkundur në qëndrimet e tij kundër bashkimit në qeverisje me Kadri Veselin e Ramush Haradinajn.
Përmes profilit të tij zyrtar në Facebook, Pacolli ka thënë se bashkë me partnerët LDK, Alternativa e Lëvizja për Drejtësi janë të vendosur në rrugën që ka diktuar vota qytetare më 11 qershor, sipas tij, për ndryshim.
“Të nderuar miq, secili lajm që mund ta lexoni është thjesht spekulim. Qëndrimi i AKR është i qartë dhe nuk lëkundemi nga pozicioni ynë. Bashkë me partnerët e Koalicionit, LDK-në jemi të vendosur në rrugën tonë, konform vullnetit të qytetarëve të Kosovës për ndryshim”, ka shkruar Pacolli.
Kujtojmë se asnjë nga partitë pas zgjedhjeve të 11 qershorit nuk ka arritur të fitojë shumicën për bërjen e qeverisë, andaj është i pashmangshëm një koalicion paszgjedhor mes partive. /tesheshi.com/
