Kreu i diplomacisë kosovare, Behgjet Pacolli është përfshirë në një përplasje me kreun e serbëve të Bosnjës, Milorad Dodik. Kjo pasi ky i fundit, pak ditë më parë nuk lejoi që Pacolli dhe një delegacion kosovar të marrë pjesë në një takim jozyrtar të ministrave të jashtëm të vendeve anëtare të Procesit për Bashkëpunim në Evropën Juglindore – SEECP.
“Krijimi i situatës së paqartë politike është një lloj i mbijetesës për njerëz si ai. Ai e ka humbur sensin e realitetit”, ka thënë Pacolli.
Dy ditë para takimit, Dodik tha se Pacolli nuk është i mirëpritur në Banja Luka. Pacolli lë hapur mundësinë që kjo të jetë “lojë e dyfishtë, prapa të cilës qëndron Beogradi”.
“Kjo mund të jetë një lojë të dyfishtë, duke marrë parasysh faktin se Dodik është një kukull politike e Beogradit”, ka thënë Pacolli.
Kreu i diplomacisë së Kosovës zbulon se ai është takuar më parë me Dodik, ndërkohë që ky i fundit e ka mohuar kategorikisht këtë gjë.
“Njëherë jam takuar shkurtimisht në vitin 2002, dhe herën e dytë ai më priti në aeroportin e Banja Lukës, ku kemi biseduar për disa nga projektet e zhvillimit të zonës, veçanërisht rafinerinë në Bosanski Brod. Në atë takim unë po udhëtoja me mikun tim, një partner biznesi i cili jeton në Zvicër, Branko Crnogorac. Dodiku na priti shumë mirë dhe u soll me mirësi me ne”, tha Pacolli.
Kreu i diplomacisë kosovare përsërit se aktivitetet politike të Dodik drejtohen dhe udhëhiqen nga Beogradi.
“Veprimet e tij mund të jetë me qëllim ndërhyrjeje në çështje të tilla si dialogu në mes të Prishtinës me Beogradin”, tha Pacolli. /tesheshi.com/
