Kryeministri Edi Rama ka vizituar Durrësin, i shoqëruar nga ministri e Jashtëm në detyrë të Kosovës, Behgjet Pacoli.
Rama është shprehur se shpreson që brenda 2020 të gjithë shtëpitë e rrënuar nga tërmeti të ndërtohen.
“Është situatë shumë e vështirë, por besoj që do t’ia dalim. Ajo që nuk bëjmë dot është të kthejmë në jetë ata që humbën jetën. Kemi shumë të plagosur, pjesa më e madhe me plagë të lehta. Kemi gatishmëri për t’i çuar edhe jashtë. Brenda 2020 besoj do i kemi futur të gjithë në shtëpia”, tha kryeministri Rama.
Nga ana tjetër, Pacolli, një nga njerëzit më të pasur në Kosovë dhe ndërmarrës i suksesshëm në fushën e ndërtimit, ka thënë se ai personalisht është angazhuar për të bërë zgjidhje të strehimit për familjet e prekura.
“Populli i Kosovës po solidarizohet. Unë personalisht, por edhe të gjithë të tjerët jemi duke punuar dhe besoj se që nga dje veçse është bërë shumë punë. Ne jemi të gatshëm t’ju vijmë në ndihmë të plagosurve, ata që kanë nevojë për shërim dhe ata që kanë mbetur pa strehim”, u shpreh Pacolli.
I njohur si ndërmarrësi më i suksesshëm në Kosovë, pasuria e tij është krijuar falë punës shumëvjeçare pikërisht në industrinë e ndërtimit në shtetet perëndimore por edhe ato të Lindjes. /tesheshi.com/
