Ministri i jashtëm i Kosovës, Behgjet Pacolli raportohet të ketë pasur një debat të ashpër me homologun e tij serb, Ivica Daçiç, në Asamblenë e Përgjithshme të OKB-së.
Ishte Daçiç ai që ditë më parë e akuzoi Pacollin se po gënjen me deklaratat e tij se Kosova i ka votat për anëtarësim në UNESCO.
Pacolli dhe Daçiç janë takuar gjatë qëndrimit në Njo Jork, dhe ministri Pacolli e ka pyetur kreun e diplomacisë serbe pse i ka bërë ato deklarime.
“Në selinë e Kombeve të Bashkuara u takuam me ministrin e jashtëm të Kosovës, Behgjet Pacolli dhe ai më pyeti se pse thashë se po gënjen”, deklaroi Daçiç.
Ministri i jashtëm serb gjithashtu ka deklaruar se zyrtarët e Kosovës po japin të dhëna jo të sakta për njohjet, duke e marrë shembullin e Republikës së Mauritiusit.
“Përfaqësuesit e Kosovës për shkak të arsyeve të tyre të brendshme politike japin të dhëna jo të sakta. Siç është rasti me të dhënat se Mauritania e ka njohur Kosovën. Menjëherë i kam thirrur përfaqësuesit e qeverisë së Mauritanisë, me të cilët kam marrëdhënie të mira. Serbia e mbështet Mauritaninë në rastin e integritetit territorial dhe është bashkuar me deklarimet e tyre dhe rezolutat e OKB-së. Në bisedë më kanë thënë që nuk kanë ndryshim të qëndrimit”, shtoi ministri serb.
Ai gjithashtu foli edhe për mundësinë e anëtarësimit të Kosovës në UNESCO, duke deklaruar se Kosova nuk do ta mposhtë Serbinë në Asamblenë e Përgjithshme, nëse vendos të aplikojë.
“Me sigurinë e plotë mund të them, edhe pse nuk e di nëse do të aplikojnë, se Kosova nuk do ta mposhtë Serbinë në Asamblenë e Përgjithshme të UNESCO-s në nëntor”, përfundoi Ivica Daçiç. /tesheshi.com/
