Nga Bashkim Kastrati
Një numër i madh i pacientëve në Kosovë nuk i dinë të drejtat e tyre si pacientë. Ata shpesh nuk trajtohen dhe nuk respektohen siç duhet në institucionet shëndetësore publike të Kosovës, e sidomos në Qendrën Klinike Universitare të Kosovës (QKUK), konkretisht në ambulancat specialistike. Ndërsa është raportuar shpesh se trajtimi i tyre nga po të njëjtit mjekë që punojnë edhe në sektorin privat gjatë pasdites apo të shtunave është krejtësisht ndryshe.
Kjo ka bërë që pacientët që kanë mundësi financiare të mos shkojnë në QKUK, por të drejtohen në klinikat private shëndetësore.
Sipas një hulumtimi të realizuar nga Shoqata për të Drejtat e Pacientëve e Kosovës mbi 55 për qind e të anketuarve nuk kanë njohuri për të drejtat që i kanë.
Ndonëse institutcionet publike shëndetësore janë të obliguara me Ligjin për Shëndetësi që t’i vendosin në hapësira spitalore kartat e të drejtave të pacientëve, këta të fundit duket se as që i kanë vërejtur këto informacione ndonjëherë.
Zakonisht pacientët nuk e ushtrojnë të drejtën e tyre për ankesa, por edhe nëse e bëjnë këtë shumë rrallë ndodh që të ndëshkohet dikush nga stafi mjekësor.
Pacientët të pakënaqur me trajtimin që iu bëhet në QKUK
Zakonisht tollovitë më të mëdha bëhen në Qendrën Klinike Universitare të Kosovës. Tesheshi.com ka pyetur disa nga pacientët që po prisnin për t’u kontrolluar në ambulancat specialistike në QKUK dhe ankesat e tyre kishin të bëjnë me pritjen e madhe në radhë, mosrespektimin e radhës dhe kohën e shkurtër që sipas tyre ua kushtojnë mjekët.
“Unë kam udhëtuar mbi afër 100 kilometra për të ardhur për t’u vizituar këtu, zakonisht kur vijë, mbërrijë herët në mëngjes, por radha është shumë e gjatë, duhet pritur mjekun deri në ora 9 dhe pastaj fillojnë vizitat. Por më e keqja është që edhe kur vizitohem mjeku nuk me dëgjon për krejt ankesat 1-2 minuta e kryen. Unë kërkoj më shumë përkushtim nuk kam faj që tash radha është e gjatë dhe mjeku mund të vonohet më shumë sesa orari që e ka. Nuk jam ankuar kurrë se nuk ke ku ankohesh të gjithë i dinë këto probleme”, thotë Sadetja, e cila kishte ardhur nga një fshat i Komunës së Pejës.
Gjithashtu edhe Qërimi ankohej për pritje të madhe në radhë dhe mosrespektim të radhëve. Ai thotë se ka parë edhe raste kur stafi mjekësor nuk sillet aq mirë ndaj pacientëve.
“Problemi këtu është se zakonisht vijnë njerëzit e varfër, që i përkasin një shtrese të ulët dhe ata shihen me një sy tjetër nga stafi mjekësor. Ka pasur raste kur kam parë sjellje jo të mirë dhe përbuzëse të mjekëve, por nganjëherë edhe këta ngarkohen shumë pasi që të i njëjti mjek ka dhjetëra pacientë që paraqitën për t’u vizituar”, thotë ai.
Qendra Klinike Universitare e Kosovës është e ngarkuar edhe për faktin se Prishtina nuk ka një spital rajonal ku do të bëheshin kontrollimet mjekësore dhe të gjithë ata që kanë nevojë duhet të drejtohen në këtë institucion, që është institucionet shëndetësor i kategorisë terciare, pra vetëm i rasteve që nuk mund të trajtohen në spitalet rajonale.
Ministria e Shëndetësisë ka marrë 116 ankesa
Faik Hoti, drejtor i departamentit për infomrim në Ministrinë e Shëndetësisë, ka thënë për tesheshi.com se nga linja falas për ankesa që ka kjo ministri, ka vënë në funksion për qytetarët që të denoncojnë shkeljet e supozuara ndaj tyre me rastin e marrjes së shërbimeve shëndetësore.
“MSh ka pranuar 116 ankesa, prej te cilave 86 janë shqyrtuar nga institucionet ndaj të cilave janë drejtuar, Inspektorati Shëndetësor dhe mekanizmat e tjerë që i trajtojnë ankesat”, thotë Hoti, duke shtuar se natyra e ankesave ka të bëjë me mungesën e mjekut në vendin e punës, sjellje jo të mira të stafit mjekësor siç janë shprehur ankuesit, mungesën e barnave etj.
Ai thotë se përveç linjës falas që ka Ministria e Shëndetësisë, gjithashtu ka edhe mekanizma tjerë si Këshillat Etiko- profesional, që janë të ngritura në nivel të institucioneve si shkallë e parë e ankesës dhe Bordi për Çështje Etike dhe Profesionale në nivel të MSH-së si shkallë e dytë e ankesës.
“Nëse denoncuesi nuk është i kënaqur me përgjigjen që atij i jep Këshilli Etiko-Profesional apo Bordi, ai ka të drejtë t’i drejtohet edhe gjykatës. Ka edhe mjaft ankesa që janë të pabazuara dhe që ankuesit nuk mund t’i argumentojnë pretendimet e tyre apo nuk ofrojnë fakte dhe në raste të tilla, ato hedhen poshtë”, theksoi Hoti. /tesheshi.com/
