Radhë njerëzish që kërkojnë të regjistrojnë bizneset e tyre, është panorama më e fundit nga Qendra Kombëtare e Regjistrimit. Një gjë e tillë ka ditë që ka nisur, sipas zyrtarëve në këtë qendër, e ka të bëjë me interesin e shtuar të qytetarëve për të regjistruar bizneset.
Duket se paralajmërimi I kryeministrit Rama se në shtator do të nisë aksioni kundër informalitetit, ka vënë në lëvizje shkelësit në këtë drejtim. Pa nisur ende, aksioni po jep rezultate, regjistrimin e bizneseve në sportelet e QKR-së në të gjithë vendin.
Sipas zyrtarëve të QKR-së, nga fillimi i muajit aplikimet për hapjen e bizneseve të reja janë rritur me katër herë.
Kryeministri Edi Rama deklaroi në fund të korrikut se Qeveria do të nisë në muajin shtator një aksion frontal kundër informalitetit në sektorin e të ardhurave, pasi aty paraqitet një situatë e ngjashme me sektorin e energjisë. “Një pjesë paguan, një pjesë nuk paguan dhe ata që paguajnë, paguajnë edhe për ata që nuk paguajnë. Aksioni do të jetë i shtrirë në çdo qytet, në çdo aktivitet tregtar”, tha Rama në atë kohë. /tesheshi.com/
