Paralel me ndeshjet në Europë për kualifikueset e Botërorit, në Amerikën e Jugut janë zhvilluar po ashtu takime të tilla.
Pas pesë sfidave të luajtura para më pak se një jave, në këtë të mërkurë janë zhvilluar pesë takime të tjera në grupin amerikanolatin me dhjetë skuadra.
Argjentina, e cila fitoi të premten ndaj Uruguajit falë një goli të Messi-t, nuk ka mundur të sigurojë më tepër se një barazim ndaj përfaqësueses së fundit në grup, historikisht më modestes në kontinent, Venezuelës.
Pa Messi-n në formacion, që mungonte për shkak të dëmtimit, por edhe pa një sërë lojtarësh të tjerë, posaçërisht në sulm, Argjentina ka qenë me fat që ka barazuar.
Venezuela ka kryesuar 2-0, për të ardhur te dy golat e Argjentinës, të shënuar nga Pratto e Otamendi në minutën e 58-të dhe të 83-të.
Me këtë barazim 2-2 në fushën e Venezuelës, Argjentina ka zbritur në vend të tretë në grup, me 15 pikë, po aq sa Brazili, e me një më pak se Uruguaji i vendit të parë.
Neymar po kalon një moment të shkëlqyer me përfaqësuesen braziliane. Pasi e ndihmoi skuadrën olimpike të fitonte medaljen e artë në Olimpiadë, e pasi i shënoi Ekuadorit të enjten, i ka dhënë fitoren Brazilit ndaj Kolumbisë me golin e tij.
Brazili fitoi 2-1 ndaj Kolumbisë, me golin e dytë të shënuar nga Neymar në minutën e 74-t.
Fitues i Kupës së Amerikës, Kili po bën paraqitje jo të mira në kualifikueset e Botërorit. Të premten do të humbiste me Paraguajin, ndërkohë që këtë të mërkurë ka barazuar 0-0 me Bolivinë.
Kili gjendet aktualisht në vend të shtatë në grup, në pozita që nuk e çojnë në Botëror.
Në dy takimet e tjera, Uruguaji ka fituar thellë ndaj Paraguajit, 4-0, e Peruja e ka mposhtur 2-1 Ekuadorin. /tesheshi.com/
