Nga Blendi Gashi
Deputeti më i vjetër në Kosovë, Adem Mikullovci ka habitur jo pak me qëndrimin e tij për rastet e dhunës në familje, kur diskutohej Kodi Penal në një nga seancat e fundit plenare të Kuvendit të Kosovës. Duke kërkuar “përshtatjen” e ligjeve me Kanunin e Lekë Dukagjinit, Mikullovci tha se nuk mund të bëhen njësoj ligjet si në Kosovë, si në Angli.
Për të qenë më i qartë ai bëri një deklaratë vërtetë të habitshme sipas të cilës “pa e rreh fëmijën, fëmija nuk bëhet terrbjet”, apo duke u shprehur i pakënaqur për masën e dënimint me dy vjet për burrat që dhunojnë gratë.
“Unë dua të them, ju e dini që nuk jam jurist, por e shfletova materialin dhe u mundova të kuptoj ca gjëra. Por e vërejta dhe nuk më pëlqeu që këtij kodi nuk po i vije era shqip. Mendoj që është dashtë të mbështetën ata ekspertët e juaj pak edhe në tradita e edhe në pleqnarë. Pleqnia jonë ka ditur të zgjidhë konfliktet që nuk kanë ditur as juristët t’i zgjidhin. Por unë u ndala edhe në dhunën familjare. Të kuptohemi që dhuna familjare nuk mund të aplikohet si në Amerikë e Angli e ata tjetër atje, ne jemi tjerë dhe duhet të iu tregojmë që jemi tjetër. Ta marrë veç një shembull, sipas këtij Kanuni, sipas këtij Ligji sipas këtij Kodi, nëse gruaja e padit burrin e burri shkon në burg, më tregoni a e prit ajo grua burrin në shtëpi, hajt më tregoni. Mandej, le të flasin ata çka të donë, por pa e rrahë fëmijën, fëmija nuk bëhet terrbije, dijeni. Mandej këtu e përkrahi plotësisht Mialim Zekën, dhe mendoj që pak tepër po mundohemi të bëhemi anglez, si thotë ajo fjala popullore më papë se Papa, nuk po vjen era shqip, e kjo më ka penguar”, është deklarata e plotë që bëri Mikullovci.
Por kjo deklaratë nuk i ka pëlqyer aspak bashkëpartiakëve të tij dhe jo vetëm, ndërsa nga mediat është cilësuar se deputeti në fjalë bën thirrje për dhunë ndaj fëmijëve.
“Të sqarohet Mikullovci”
Deputetja e Vetëvendosje, Albulena Haxhiu, e ka quajtur këtë deklaratë të papranueshme duke thënë se Mikullovci duhet të sqarohet për këto deklarata të tij.
“Deputeti Adem Mikullovci është person me vlera të larta për të cilin kam shumë respekt por disa herë kam biseduar me të për mënyrën e shprehjes së tij. Deklarata e sotme është e papranueshme dhe nuk korrespondon me vlerat që duam t’i ndërtojmë. Besoj që baca Adem do të sqarohet për publikun për këto deklarata!”, shkruan Haxhiu në Facebook.
Ndaj deklaratës në fjalë ka reaguar edhe avokati Arianit Koci i cili beson se deputeti Mikullovci nuk ka pasur qëllim të keq.
“Baca Adem Mikullovci: Sa të njoh unë, e të njoh shumë mirë, ti nuk je i tillë! Nuk je ti që e promovon dhunën dhe diskriminimin ndaj kujtdo qoftë. Nuk je ti që e promovon primitivizmin! Sarkazëm me elemente të ironisë, duhet të ketë qenë fjalimi i yt në Kuvend! Mos na dëshpëro!”, shkruan Koci në Facebook.
Përkundër këtyre reagimeve nuk ka pasur një sqarim nga deputeti Mikullovci dhe mbetet të shihet nëse do ketë në ditët në vijim./tesheshi.com/
